„Þetta er rosalegt. Game changer. Ég veit að það er rosalega 2001 að velta sér upp úr útliti stjórnmálafólks, en þetta er bara svo mikið. Svo mikið í einu. Litaði hann í öll þessi ár?,“ spyr Hrafn Jónsson, kvikmyndagerðarmaður og pistlahöfundur á Kjarnanum, á Facebook-síðu sinni.

Með færslunni deilir Hrafn mynd af Bjarna Benediktssyni forsætisráðherra sem birtist á vef RÚV fyrir skemmstu. Af myndinni að dæma verður ekki betur séð en að Bjarni sé orðinn gráhærður.

„Vaknaði hann bara í morgun gráhærður? Ég er eiginlega kominn á það að hann sé að lita það grátt núna til þess að gefa sér meiri vigt. Sem maður sem er að grána mjög fljótt (í skegginu, við tölum ekki um hárið hér) þá finnst mér þetta vera sigur. 2017 verður ár hins gráa; hins visnaða. Það er allt fallegast að hausti,” skrifar Hrafn.

Kolbeinn Óttarsson Proppé, þingmaður Vinstri grænna, skrifar athugasemd við færslu Hrafns og segir: „Ár hins visnaða. Það finnst mér fallegt og spennandi.“