Fjölmiðlakonan Ellý Ármanns ritstjóri og eigandi frettanetid.is prýðir forsíðu júní tölublaðs MAN sem kemur í verslanir í dag. Ellý vakti athygli fyrir hispurslaus skrif um fræga fólkið á vef Vísis, en stofnaði Fréttanetið eftir að hafa misst vinnuna hjá 365 en þar hafði hún starfað í 9 ár. Í einlægu viðtali við MAN ræðir hún m.a. skilnað sinn við sambýlismann sinn til 13 ára og barnsföður.
„Það var fjölmiðlasamband en við störfuðum bæði við fjölmiðla þá og hrærðumst í þeim hraða heimi. Það var mikið um skemmtanahald, stress og álag. Ég ákvað að loka þeim kafla þegar farið var að halla undan fæti. Okkur var báðum sagt upp störfum hjá 365 og það setti stórt strik í reikninginn, sambandið gekk illa eftir það. Það var mikið um drykkju sem ég fúnkeraði ekki í,“ segir Ellý m.a í viðtalinu.
Ellý á tvo syni úr fyrra sambandi og segir það hafa verið hræðilega upplifun að skilja í annað sinn.
„Ekki síst þar sem við misstum húsið okkar, lánin höfðu rokið upp úr öllu valdi og við vorum bæði án atvinnu. Við reyndum að semja við bankann án árangurs og svo fór að húsið var selt bankanum á uppboði.“
DV greindi svo frá því seint á síðasta ári að Ellý væri komin á fast með athafnamanninum Steingrími Erlingssyni, stofnandi og fyrrverandi forstjóri Fáfnis Offshore. Í viðtali við MAN segir Ellý:
„Hver einasti dagur með honum er ævintýri líkastur. Við látum eins og kjánar en á sama tíma erum við samstillt og það á jafningjagrundvelli.“
