Harry prins óttast fullkomna útskúfun frá Bretlandi og konungsfjölskyldunni þegar bróðir hans, Vilhjálmur Bretaprins, tekur við sem konungur. Þetta hefur breska götublaðið The Sun eftir  konunglegum sérfræðingum. Harry þráir að ná sáttum við föður sinn, Karl konung, en samband þeirra hefur verið stirt síðan hann og eiginkona hans, Meghan Markle, sneru baki við konungsfjölskyldunni árið 2020 og fluttu vestur um haf.

Nýlega funduðu aðstoðarmenn Harrys og Karls í London, sem ýtti undir sögusagnir um mögulegar sættir milli feðganna. Athygli vakti hins vegar að enginn fulltrúi Vilhjálms sat fundinn.

Tom Bower, sérfræðingur í málefnum konungsfjölskyldunnar, segir að Harry sé  „örvæntingarfullur“ um að ná sáttum við föður sinn, en að allt bendi til að Vilhjálmur sé mun langræknari og hafi engan áhuga á að fyrirgefa bróður sínum. Er það sér í lagi vegna ummæla Harrys um Katrínu prinsessu, eiginkonu Vilhjálms, í ævisögu hans, Spare.

Sagði Harry í bókinni að Katrín hefði bæði verið kuldaleg og ógestrisin við Meghan þegar hún var að stíga sín fyrstu skref innan konungsfjölskyldunnar.

Harry hefur fengið öryggisgæslu sína vestanhafs greidda af bresku krúnunni. Er hann sagður óttast það mjög að Vilhjálmur prins muni slaufa því fyrirkomulagi þegar hann verður orðinn konungur.

Er prinsinn því sagður leggja allt kapp á að laga sambandið við föður sinn sem fyrst í þeirri von um að það geti brúað bilið milli hans og stóra bróður.