Raunveruleikastjarnan Lisa Rinna hefur tjáð sig um þrálátar sögusagnir um að eiginmaður hennar, Harry Hamlin, sé samkynhneigður.

„Við skulum bara koma þessu á hreint í eitt skiptið fyrir öll: Harry er gagnkynhneigður,“ skrifar Rinna í nýrri bók sinni, You Better Believe I’m Gonna Talk About It.

„Hann er ekki hommi á nokkurn hátt, lögun eða formi, án þess að það sé þó nokkuð að því.“

Raunveruleikastjarnan, sem gerði garðinn frægan í Real Housewives-þáttunum, segir að sögusagnirnar megi rekja allt aftur til ársins 1982 þegar Harry Hamlin lék samkynhneigðan mann í kvikmyndinni Making Love.

„Meginstraumskvikmyndir um samkynhneigða menn eru enn sjaldséðar í dag en í þá daga var slíkt óheyrt,“ útskýrir Rinna. Hamlin fannst rétt að taka hlutverkið að sér á sínum tíma og sýndi að mati Rinnu mikið hugrekki. Hann hafði þó ekki hugmynd um að kvikmyndin myndi hafa langvarandi afleiðingar á einkalíf hans og feril.

Rinna segir að Hamlin hafi í kjölfarið verið settur á bannlista í kvikmyndaiðnaðinum. Hann hafi leikið hlutverkið svo vel að allir voru sannfærðir um að hann væri hommi. Það hafi svo ekki hjálpað að Hamlin er mikill smekksmaður sem elski að klæða sig í smart föt.

„Þegar þú ert myndarlegur maður í Hollywood með góðan smekk, þá greinilega jafngildir það því að vera hommi.“