Hljómsveitin Fjöll hefur gefið út nýtt lag, „Holur“, sem er fjórða lagið sem hljómsveitin sendir frá sér.
„Holur er afslappað indírokk með óvæntum hliðarskrefum og er það aðgengilegt í tveimur útgáfum, einni allt of langri, sem er þó nákvæmlega nógu löng, og annarri styttri,“ segir í tilkynningu sveitarinnar.
Fjöll eru þeir Guðmundur Annas Árnason söngvari og hljómborðsleikari, Snorri Gunnarsson söngvari og gítarleikari, Guðmundur Freyr Jónasson gítarleikari, Kristinn Jón Arnarson bassaleikari og Ragnar Þór Ingólfsson trommari.
Þá hefur sveitin boðað tónleika á skemmtistaðnum Lemmy að kvöldi sumardagsins fyrsta, þann 24. apríl.
„Fjöll er nýkomin úr upptökuferð til Valencia, þar sem lagður var grunnur að fyrstu stóru plötu sveitarinnar sem nú er í vinnslu. Bandið er því í dúndurformi og hlakkar til að kynna nýtt efni á Lemmy,” segir í tilkynningunni.
Lagið á Spotify:
