Erlendur karlmaður, að því er virðist bandarískur, lýsir í færslu á samfélagsmiðlinum Reddit yfir hrifningu á beinskeytni Íslendinga. Hann segir það frískandi fyrir hann og eiginkonu sína að koma til Íslands og upplifa annars konar samskipti og anda en í New York þar sem þau búa. Íslendingar séu hreinskilnir og blátt áfram og það kunni hann að meta.

Maðurinn segir þau hjónin vera um þessar mundir á Íslandi. Þetta sé fyrsta ferð hennar til landsins en hans fimmta á síðustu 30 árum. Eiginkonan hafi minnst sérstaklega á hvað Íslendingar væru mikið ósviknir, ekta (e. authentic):

„Það er ekkert kjaftæði. Bara blátt áfram. Það sem þú sérð er það sem þú færð. Þeir eru mjög vinalegir og ótrúlega hjálpsamir. Við búum í New York og að segja að Ísland sé frískandi á allan máta er gríðarlega vægt til orða tekið.“

Nokkrir taka til máls í athugasemdum. Í einni er fullyrt að Íslendingar hafi ekki sömu þörf og Bandaríkjamenn til að flýta sér og fá lausn sinna mála sem fyrst en það má deila um hversu algild sú lýsing er um Íslendinga.

Sætt

Kona tekur til máls og segist aldrei hafa orðið eins auðmjúk og á Íslandi. Í búningsklefa Vesturbæjarlaugar hafi íslensk kona sem líklega hafi verið yfir sjötugt og ekkert kunnað í ensku komið til hennar þegar við blasti að hún væri í vandræðum með hárþurrkuna í klefanum. Konan hafi verið nakin en það hafi ekki skipt neinu máli þegar hún hafi sýnt hvernig hárþurrkan virkaði:

„Svo sætt, svo frjálslegt og svo sönn góðmennska.“

Nokkrir benda á að á Íslandsferðum sínum hafi þeir ekki komist í kynni við neina innfædda Íslendinga. Fólk í þjónustustörfum sem þeir hafi talað við hafi allt verið innflytjendur og það sé þar að auki hluti af starfi þeirra að vera vinalegt. Í einni athugasemd segir að innflytjendur fullyrði við viðkomandi að ef þeir þykist vera Íslendingar fái þeir meira þjórfé.

Málshefjandi fullyrðir hins vegar að hann hafi átt í samskiptum við innfædda Íslendinga en ekki bara innflytjendur í þjónustustörfum. Hann hafi jú fyrst komið til Íslands fyrir 30 árum og eigi íslenska vini. Hann segir þau hjónin ekki ætla að bíða lengi eftir næstu Íslandsheimsókn:

„Þetta land er að toga okkur bæði til sín.“