Vélin sem um ræðir á að fjarlægja örplast og eiturefni úr líkamanum og er ekki ókeypis. Meðferðin, sem tekur um tvær klukkustundir, kostar 10 þúsund pund, eða rúmar 1,7 milljónir króna á núverandi gengi. Virtist leikarinn býsna afslappaður þar sem hann sat í hægindastól tengdur við alls konar snúrur.
Í meðferðinni er blóð tekið úr báðum handleggjum og það sett í gegnum skiljunarvél sem á að sjá um að hreinsa óæskileg efni burt. Clarify Clinics er fyrsta stofan í heiminum sem býður upp á þessa þjónustu og hafa forsvarsmenn hennar fullyrt að hægt sé að fjarlægja um 90-99% af örplasti úr blóðinu.
Þá á hún að draga úr bólgum í líkamanum sem sagðar eru tengjast einhverjum tegundum krabbameina og taugasjúkdóma.
Í umfjöllun Mail Online kemur fram að ýmsir læknar hafi sett fyrirvara við meðferðina og efast um hversu gagnleg hún er. Benda þeir á skort á „áreiðanlegum gögnum“ um árangurinn.
„Ég veit ekki til þess að til séu áreiðanleg gögn sem sýna að meðferðin hafi þau áhrif sem fullyrt er. Ég er ekki einu sinni viss um að hún fjarlægi neitt annað en fullt af peningum frá viðkomandi,“ segir Edzard Ernst, heiðursprófessor við Háskólann í Exeter.
Yael Cohen, framkvæmdastjóri Clarify Clinics, blæs á raddir efasemda og segir meðferðina örugga og árangursríka.
