Sigurður Sigurjónsson, eða Siggi Sigurjóns eins og hann er gjarnan kallaður, var valinn leikari ársins á Grímuverðlaununum, uppskeruhátíð íslenskra sviðslista, í gærkvöldi.

Viðurkenninguna hlaut Sigurður fyrir hlutverk sitt í sýningunni Heim sem sýnd var í Þjóðleikhúsinu.

Sigurður hefur víða komið við á farsælum ferli sínum í leiklist hér á landi og má segja að hann sé vel að verðlaununum kominn.

Vinur hans, leikarinn Pálmi Gestsson, sendi honum fallega kveðju á Facebook þegar ljóst var að hann væri leikari ársins.

„Mikið óskaplega gladdi það mig ósegjanlega að einn minn besti vinur og félagi í áratugi, einhver besti leikari Íslandssögunnar skuli loksins hafa fengið sína fyrstu Grímu nú þegar hann er að ljúka föstu ævistarfi sínu við Þjóðleikhúsið. Ég veit að hann er hvergi hættur því hann er afar eftirsóttur leikari og í bullandi formi og á eftir að setja mark sitt á íslenskt leiklistarlíf í mörg ár enn. Til hamingju elsku vinur!”

Margir tóku undir þessa fallegu kveðju. „Verðskuldað elsku vinur,“ sagði félagi þeirra úr Spaugstofunni, Randver Þorláksson. „Elska hann,“ sagði Bubbi Morthens.