Dægurlög hafa styst um 18 prósent eða um tæpa mínútu á 35 árum. Ekki er óalgengt að vinsælir slagarar nú á dögum séu ekki nema rúmar 2 mínútur.

Þetta kemur fram í nýrri greiningu tímaritsins The Economist á dægurlögum undanfarinna 70 ára eða svo. Það er könnuð voru öll lögin sem komist hafa á topp bandaríska vinsældalistans, Billboard 200, og þau tímamæld. Þetta eru um 1200 lög samanlagt.

Niðurstaða greiningarinnar er sú að meðallengd vinsæls dægurlags árið 2024 sé aðeins 3 mínútur og 34 sekúndur. Þetta er stytting um 48 sekúndur, eða 18 prósent, síðan árið 1990 þegar lengdin var mest. Það er 4 mínútur og 22 sekúndur.

Eins og sést myndrænt hjá The Economist hefur lengd dægurlaga farið í kúrvu frá árinu 1958 til dagsins í dag. Um miðjan sjötta áratuginn breyttist dægurlagatónlist mikið með tilkomu rokksins. Lög voru gjarnan mjög stutt, mun styttri en í dag og meðaltalið aðeins um 2 mínútur. Eftir það kom tími albúmanna, tónlistin varð þróaðri og framúrstefnulegri og lögin lengdust stöðugt.

Lengsta lagið sem náð hefur toppi vinsældalistans er „Hey Jude“ með Bítlunum frá árinu 1968. Það er heilar 7 mínútur og 15 sekúndur að lengd. Stysta lagið er „Stay (Just a Little Bit Longer)“ með Maurice Williams frá árinu 1960.

Eins og áður segir var það fáheyrt að vinsælustu lögin væru aðeins 3 mínútur að lengd árið 1990 eða þar um kring. Núna slá lög á borð við „Short ´n Sweet“ með Sabrinu Carpenter og „Brat“ með Charli XCX í gegn þrátt fyrir að vera aðeins 2 mínútur.

Á sjötta áratugnum voru lög stutt af því að þau voru gefin út á smáskífum, það er þau voru stutt af tæknilegum ástæðum. Í dag er talið að tæknin sé aftur að hafa áhrif, en á annan hátt. Það er vegna streymis og TikTok. Lagahöfundar þurfa að ná strax til hlustandans áður en þeir missa hann, hafa aðeins nokkrar sekúndur til þess. Þess vegna er farið mun fyrr inn í grípandi viðlag en áður og inngangurinn styttur til muna. Þeim mun styttra sem lag er þeim mun oftar er hægt að streyma því.