Katla Hreiðarsdóttir, eigandi verslunarinnar Systur og makar í Síðamúla, segist vera orðlaus eftir að hafa orðið vitni að óheiðarleika fastakúnna verslunarinnar. Viðskiptavinurinn hafi farið ránshendi um verslunina og troðið varningi inn undir úlpuna sína en misst þýfið á leiðinni út úr verslunni. Mannlíf greindi fyrst frá.

„ … Fullorðin kona sem hefur verslað hjá okkur nokkrum sinnum tróð inn á sig kjól og fleiru en missti undan úlpunni sinni á leiðinni út!,“ segir í færslu á Instagram-síðu verslunarinnar.

Í annarri færslu segir Katla að eiginmaður hennar hafi farið í gegnum myndbönd úr öryggiskerfi verslunarinnar og þar sést athæfi konunnar glöggt. „Hún labbar um alla búðina og treður og treður og treður inn á sig,“ segir Katla. Konan var stöðvuð við útidyrahurð verslunnarinnar en auk tveggja flíka var hún með fullt af smáhlutum úr versluninni á sér.

„Við erum í áfalli. Ég er svo reið. Þetta er manneskja sem ég hef afgreitt margoft niður í búð,“ segir Katla. JKonan sé komin til ára sinna, haltrar við og notar staf en eiginmaður hennar leggur yfirleitt í stæði hreyfihamlaðra fyrir utan búðina. Starfsmenn verslunarinnar þekki konuna vel og segir Katla að stjanað hafi verið við hana í gegnum tíðina og hafi hún til að mynda verið aðstoðuð með vörur út í bíl. Segist Katla óttast að þetta hafi ekki verið í fyrsta sinn sem konan lætur greipar sópa um búðina.

Segir Katla að konunni verði hér eftir meinaður aðgangur að verslunninni og hyggst hún kæra athæfið til lögreglu.

Hér má sjá færslu Kötlu á Instagram-síðu verslunarinnar.