Gene Simmons, sem var áður bassaleikari rokkhljómsveitarinnar KISS, sér ekki eftir neinu varðandi ummæli sín í þættinum Dancing With the Stars. Hafa sumir netverjar á samfélagsmiðlum sagt ummæli hans í þættinum vera „perraleg.“
Um er að ræða þátt þar sem keppendur dönsuðu við þekkt hármetal lög hljómsveita á borð við Bon Jovi, Warrant og Twisted Sister. Sem gestadómari talaði Simmons mikið um útlit keppenda frekar en danshæfileika.
Meðal annars sagði hann: „Danny, ég er að segja þér það. Þú stendur við hliðina á einum af fallegustu konum á plánetunni.“
Hafa ber í huga að talsmáti sem þessi er ekkert nýtt hjá Gene Simmons, sem ásamt söngvaranum Paul Stanley, hafa meðal annars gortað sig af því hafa sofið hjá þúsundum kvenna. Má segja að kvensemi sé hluti af ímynd KISS.
Þetta virðist hins vegar hafa verið nýtt fyrir áhorfendum Dancing With the Stars. „Athugasemdir Gene Simmons um dömurnar minnir mann á ógeðslegan frænda sem reynir að tala við mann á ættarmóti,“ var sagt á samfélagsmiðlum.
Þessi „stormur“ virðist hins vegar ekki hafa haft mikil áhrif á Gene Simmons, sem leiðir nú sitt eigið sólóband eftir að KISS hættu á síðasta ári. Í samtali við breska blaðið The Daily Mail sagðist hann ekki sjá eftir neinu.
„Allir fjölmiðlar eru smellubeitur,“ sagði Simmons. „Ég stend við hvert orð sem ég sagði. Þetta var mjög gaman. Keppendurnir voru frábærir. Þátturinn var frábær. Horfið á þáttinn. Þetta var mjög gaman. En fjölmiðlarnir? Allir hafa eitthvað að segja. Horfið á þáttinn. Þetta var mjög gaman. Allir skemmtu sér.“
