Harry og Meghan, hertogahjónin af Sussex, virðast ekki gera neitt rétt. Í vikunni hlaut Harry hin virtu Patt Tillmann á ESPY-hátíðinni, sem eru einskonar óskarsverðlaun íþróttanna vestra. Verðlaunin hljóta þeir sem sagðir eru hafa gefið af sér til samfélagsins með eftirtektarverðum hætti. Harry er vissulega duglegur að styrkja og vekja athygli á ýmsum góðgerðamálefnum en ákvörðunin hefur farið öfugt ofan í marga Bandaríkjamenn.

Þrátt fyrir einlæga ræðu á hátíðinni og myndir af stoltri Meghan klappa fyrir sínum manni þá hafa blossað upp hávær mótmæli á netinu varðandi ákvörðunina. Skoðanakönnun sem Newsweek lét framkvæma leiddi í ljós að helmingur þeirra sem kusu voru ósáttir við að Harry hlyti verðlaunin og ljóst að óvinsældir parsins hafa aukist mikið vestra. Segja sérfræðingar að hertogahjónin séu orðin ekki síður umdeild þar ytra og í heimalandi sínu.

Eins og frægt varð ákváðu hjónin að segja skilið við bresku konungsfjölskylduna og flytja vestur um haf fyrir nokkrum árum, ekki síst til þess að fá frið fyrir bresku pressunni. Það þykir því skjóta skökku við að hjónin geri í því að mæta á hverskonar verðlaunaafhendingar og viðburði en alls hafa þau hlotið sjö virt samfélagsverðlaun síðastliðin rúm tvö ár vestra. Þá hafa þau verið dugleg að vekja á sér athygli með sjónvarpsþáttum og hlaðvörpum og virðast í raun þefa upp eins mikla athygli og þeim er unnt þrátt fyrir að hafa í raun lýst því yfir að þau vildu vera í friði.

Tvískinnungshátturinn fer illa í Breta og Bandaríkjamenn og má vart á milli sjá hjá hvorri þjóðinni hjónin eru óvinsælli.