Íslendingar hafa alltaf haft áhuga á spádómum og því yfirnáttúrulega. Þannig hafa spádómar Nostradamusar lengi heillað Íslendinga og fyrr í dag birtist áhugaverð grein á Vísi eftir Gunnar Karl Halldórsson, stuðningsmann Ástþórs Magnússonar forsetaframbjóðanda. Þar færir Gunnar Karl rök fyrir því að í spádómum Nostradamusar og í leyndardómum talnaspeki megi finna vísbendingar um að Ástþór eigi að setjast á friðarstól á Bessastöðum.
Grein Gunnars Karls hefst á tilvísun úr bókinni Nostradamus og spádómarnir um Íslands sem hljóðar svo.
Ísland verður eins og ljósdepill í myrkvuðum heimi og þá munu Íslendingar taka sér fyrir hendur að leysa viðfangsefni, sem mikla blessun munu hafa í för með sér fyrir allt mannkynið.
Telur Gunnar Karl að ástandið í dag minni nokkuð á ,myrkvaðan heim“ enda miklar væringar milli þjóða alþjóðavísu.
„Íslendingar eru sennilega ekki þessa stundina að leysa eitthvað viðfangsefni sem tengist spádóminum. En getur verið að einhver Íslendingur sé þessa stundina, að einbeita sér að einhverju verkefni sem gæti átt við þennann spádóm? Ástþór Magnússon kannski?“ veltir Gunnar Karl fyrir sér.
Í greininni fjallar Gunnar Karl frekar um talnaspeki og hvernig reikna megi út tölur úr nöfnum manna. Telja sumir að þessi speki sé tengd orði Guðs en reiknað hefur verið út að Jesús Kristur sjálfur sé táknaður með tölunni 888.
„Því má draga þá ályktun að talan 8 sé nátengd kærleik og friði, og að friðurinn gæti orðið enn meiri ef átturnar eru fleiri. Þegar sá sem þetta ritar fór að kanna nöfn Ástþórs Magnússonar kom margt athyglisvert í ljós, í sambandi við friðartöluna 8. Ástþór er t.d fæddur í mánuði 8. Hann er einnig fæddur kl 8. Nöfn Ástþórs virðast ná að mynda líka þessa frægu tölu; 888,“ skrifar Gunnar Karl, sem slær þó þann varnagla að mismunandi útgáfur af þessum fræðum séu til og niðurstöðum beri ekki endilega saman.
„Ástþór eitt og sér er svona; 1+3+4+9+7+2 =26 (2+6=8) Talan 8 í sviganum er þá kölluð; Grunntala tölunnar 26 í þessum fræðum, en sumir segja samtala. Magnússon er=37 (3+7=10) Wium= 17 (8) En þessar tölur Ástþórs eru þá samanlagt 80. (8) Nafnið Wium er sérlega áhugavert, þar sem það myndar mjög áhugaverða ,,friðartölu“ (17) en í bókinni; When Were You Born sem Louis Hamon gaf út árið 1912 er nokkuð merkilegt sagt um þessa tölu 17. En það er á þessa leið; Þetta er háandleg tala og í líkingarfræði er hún táknuð með hinni átthyrndu stjörnu Venusar, merki friðar og ástúðar.Hún er og kölluð ,,Töfrastjarnan“ og ber þess vitni að maður sá er hún táknar, er orðin svo andlega þroskaður, að hann er vaxinn yfir þær þrautir og þá erfiðleika sem verða fyrir honum á lífsleiðinni. Hún er líka talin vera ódauðleikatala, og bendir til þess að orðstír mannsins lifi að honum látnum,“ skrifar Gunnar Karl.
Hann segir að ekki aðeins tengist talan 8 Ástþóri heldur einnig fleiri merkileg atriði.
„Á þessu ári verður Ástþór 71 árs. (8) Í ágúst (8.mán.) Hann byrjaði með frið 2000 í Austurstrætii 17 (8). Einnig er Ástþór þekktur fyrir að nota dúfur í auglýsingum, en tölurnar á bak við orðið Dúfur eru þessar; 4 6 8 6 2= 26 (8) Fyrir ,,tilviljun“ datt greinarhöfundur inn á sögu fyrir stuttu um Jeramia spámann, sem þurfti að vara lýðinn við óþægilegum hlutum, en uppskar handtöku líkt og Ástþór. Og svo einkennilega vill til, að það er talað um þessa handtöku Jeramía í kafla 26. En 26 er einmitt talan á bak við nafnið Ástþór. Líklega er þetta ábending til Íslendinga, og ættu þeir sem ekki þekkja söguna, að kynna sér hana. Einnig kemur talan 7 nokkuð við sögu hjá Ástþóri, en Ástþór hefur 7 eins og sjá má, í tölunni 17. Í dag er hann 70 ára. Rúmlega 7 k.m eru frá heimili hans til Bessastaða (Bein loftlína),“ skrifar Gunnar Karl.
Veltir hann því fyrir sér hvort að þessar vísbendingar bendi til þess að forsetaembættið sé innan seilingar hjá Ástþóri? Það sé þó ekki víst.
„En einnig mætti túlka þetta á þá leið, að hann sé sá sem ætti helst erindi á Bessastaði 2024 (8) Að lokum má geta þess að friðartalan 17 er nátengd Íslandi, en nafnið Ísland hefur tölurnar; 1 3 3 1 5 4= 17 og er það líka einkennileg ,,tilviljun“ að 17. júni skuli vera þjóðhátíðardagur landsins og einnig má sjá lengdargráðu 17 fara í gegnum landið,“ skrifar Gunnar Karl.
Grein hans má lesa í heild sinni hér
