Bashar sendir frá sér nýja smáskífu, Stone eða Steinn föstudaginn 10. maí næstkomandi. Hann kemur fram á tónleikum í London 7. maí, í París 10.maí og á Falastinvision tónleikum í Malmö laugardaginn 11. maí og síðan í Iðnó laugardaginn 18. maí.
Bashar er Íslendingum að góðu kunnur eftir að hann bauð fram Vestrið villt / Wild West og söguna um ferðalag sitt frá Palestínu til Íslands í Söngvakeppni RÚV þar sem hann freistaði þess að láta æskudraum sinn um að komast á Eurovision sviðið rætast. Innrás Ísrael á Gaza gerðist í miðju ferðalaginu og setti það í erfitt samhengi.
„Barátta foreldra minna um að Palestína fengi viðurkenningu EBU árið 2009 gaf mér hugmyndina um að verða fyrstur til að kynna þjóð mína á þessum vettvangi. Hugmyndin um að prófa að gera þetta í gegnum Ísland vaknaði eftir samstarf mitt við Hatara 2019 og síðar samstarf okkar Einars en hann er meðhöfundur og upptökustjóri á plötunni okkar. Ég hugsaði um að draga mig út þegar stríðið á Gaza braust út en á sama tíma vildi ég taka pláss og nota röddina mína. Vera palestínski fáninn á sviðinu sem núna er bannaður. Táknheimur okkar er svo mikið tabú og mér þykir þess vegna mikilvægt að þora að taka pláss.“
Bashar hafnaði í öðru sæti en þátttaka hans vakti mikla athygli fjölmiðla á borð við New York Times, Guardian og The Telegraph þar sem því var meðal annars haldið fram að þarna færi palestínska útgáfan af Lady Ga Ga sem væri líkleg til sigurs í Eurovision. „Þetta var áhugavert ævintýri og tilraun sem er núna hluti af sköpunarferlinu mínu við gerð þessarar plötu,“ segir Bashar sem setti nýverið í loftið myndband á TikTok um þetta ferðalag sitt.
@basharmuradofficial A Wild West Story: the story of how a Palestinian artist from Jerusalem ALMOST represented Iceland Eurovison 2024. #wildwest #eurovision #eurovision2024 #wildwest #esc #esc2024 ♬ Wild West by Bashar Murad – Bashar Murad
Stone eða Steinn er önnur smáskífan sem þeir félagar senda frá sér á eftir Wild West. Þjóðlagapopp þar sem stuðst er við myndmál og tákn úr palestínskri menningu til að fjalla um baráttu Palestínufólks en um leið er sungið um vonina um betri framtíð.
„Vonin er svo mikilvæg og stundum það eina sem við eigum,“ segir Bashar. Lagið er endurgerð á „On Man“ eftir Sabreen sem er brautryðjendasveit í palestínsku tónlistarlífi stofnuð af föður Bashars. Sabreen er núna upptökuver sem veitir ungum palestínskum tónlistarmönnum aðstöðu fyrir tónlistariðkun í palestínsku samhengi.
Bashar segir þetta tónlistarlega uppeldi hafa verið leikvöll sinn fyrir alls kyns tilraunir og skipt hann öllu máli að að þróast á sínum forsendum sem tónlistarmaður. Honum þyki því afar vænt um Sabreen og það sem þau hafa gefið palestínskum tónlistarmönnum og sú væntumþykja varð kveikjan af þessari endurgerð.
