Hin bandaríska Willow segist ekki vera á höttunum eftir peningum kærasta síns, David. Hún segir marga halda það vegna aldursmunar þeirra. Hún er 23 ára og hann er 62 ára.

Þau kynntust eins og margir Íslendingar, á stefnumótaforritinu Tinder. Það er óhætt að segja að fyrsta stefnumótið hafi gengið vel. Klukkutíma eftir að þau kynntust voru þau orðin kærustupar.

David starfar sem byggingaverktaki í North Carolina í Bandaríkjunum. Þegar þátturinn var tekinn upp höfðu þau verið saman í þrjá mánuði og var Willow ný flutt inn í þakíbúðina hans.

Þau hafa á þessum stutta tíma farið þrisvar til Bahamaeyja, til Las Vegas og á fleiri áfangastaði.

„Fólk segir eiginlega ekkert í persónu, en á samfélagsmiðlum lætur það ýmislegt flakka,“ segir Willow.

Fjörutíu ára aldursmunur þeirra hefur vakið mikla athygli og hörð viðbrögð.

„Fólk kallar mig gullgrafara (e. gold digger),“ segir Willow.

David segir að hann sé hættur að lesa athugasemdirnar á TikTok því hann taki þær svo inn á sig.

Horfðu á þáttinn hér að neðan.

Ástin entist ekki

Þó þátturinn hafi farið nýlega í loftið á YouTube-rás Truly, sem framleiðir Love Don‘t Judge, virðist hann hafa verið tekinn upp fyrir rúmlega ári síðan. Samkvæmt samfélagsmiðlum Willow og David voru þau saman í sirka ár, frá febrúar 2022 til febrúar 2023, en þá birtu þá síðasta myndbandið sitt saman.

Willow er nú í sambandi með öðrum karlmanni, sem er einnig mikið eldri en hún.