„Gamla kirkjan sem var afhelguð fyrir 30 árum er eitt helsta kennileiti bæjarins og okkur þótti tilvalið að gefa henni nýjan tilgang, opna fyrir almenning og breyta þessari fallegu kirkju í svítu en þó leyfa upprunalegu útliti þess að halda sér eins mikið og hægt var. Það hefur verið vinsælt víða í Evrópu af gefa fallegum gömlum byggingum nýjan tilgang, til dæmis klaustrum, myllum og auðvitað kirkjum, sem er breytt í veitingastaði, bari og gistiheimili, bæði hótel og farfuglaheimili. Það er gaman að getað gert sambærilega hluti á Íslandi,“

segir Pétur Oddbergur Heimisson, markaðs- og sölustjóri Hótel Blönduóss í samtali við DV um nýjan gistimöguleika sem hótelið býður upp á.

Þar hefur gömlu kirkjunni á Blönduósi verið breytt í glæsilega svítu, eins og myndirnar sýna.

„Þegar nýir eigendur Hótel Blönduóss festu kaup á hótelinu þá var strax ákveðið að verkefnið snérist ekki bara um hótelið heldur um gamla bæinn á Blönduósi í stærra samhengi. Gamli bærinn er alveg einstakur á Íslandi. Hér hefur götumyndin staðið svo að segja ósnortin um áratugaskeið en allt of fáir vita í raun af þessari perlu sem hér er,“ segir Pétur.

Aðspurður um hvort samfélagið á Blönduósi sé sátt við þessar breytingar á kirkjunni segir hann: 

„Hingað til höfum við ekki fundið fyrir öðru en velvilja í samfélaginu enda er heimafólk stolt af gamla bænum og ekki síst gömlu kirkjunni. Það hafa margir komið og skoðað og viðtökurnar hafa verið mjög jákvæðar. Við leggjum mikla áherslu á að passa vel upp á þetta fallega rými og berum mikla virðingu fyrir því sem kirkjan hefur gert fyrir samfélagið, fólk sem hefur verið skírt í kirkjunni, gift sig, verið fermt eða fylgt ástvinum síðasta spölinn. Ég held að heimafólk sé almennt mjög ánægt að sjá gamla heimamenn snúa á æskuslóðirnar og fjárfesta jafn myndarlega í gamla bænum og raun ber vitni.“

Þar sem hóteleigendur tóku þá ákvörðun að halda í upprunalegt útlit kirkjunnar þurfti ekki að ráðast í miklar framkvæmdir en kirkjan var máluð að innan.

„Hótel Blönduós opnaði 15. maí síðastliðinn en síðan við opnuðum hefur átt sér stað gríðarleg uppbygging í Gamla bænum á Blönduósi. Við erum einnig búin að opna kaffihús og sælkeraverslun sem heitir Apótekarastofan og í júlí opnum við viðburða- og fjölnotarýmið Krúttið. Fyrstu tónleikar í Krúttinu verða laugardaginn 22. júlí þegar Einar Örn Jónsson og Dagur Sigurðsson verða með sing-along tónleika en svo verður hægt að bóka það fyrir veislur og fleira. Í ljósi alls sem hefur átt sér stað byrjuðum við ekki á framkvæmdum á kirkjunni fyrr en í júlí en þegar þær hófust gengu þær hratt fyrir sig.“

Í vor bauð hótelið upp á leik á Facebook þar sem vinningur var gisting í kirkjunni. „Þá fyrst áttuðum við okkur á viðbrögðunum sem voru mjög jákvæð og við auglýstum svo gistinguna fyrst í gær með nýjum myndum innan úr kirkjunni og viðtökurnar hafa verið mjög góðar. Við erum komin með nokkrar bókanir í sumar en við erum nokkuð viss um að þetta verði mjög vinsæll kostur þegar fram líða stundir.“