Cooper Hefner, yngsti sonur Hugh Hefner, opnar sig um hvernig það hefði verið að alast upp í Playboy-höllinni.

Hugh Hefner var stofnandi, útgefandi og aðalritstjóri Playboy-tímaritsins. Hann lést 91 árs að aldri árið 2017 og skildi eftir sig fjögur börn.

Það er óhætt að segja að æska Cooper hafi verið litrík og frekar óhefðbundin. LadBible greinir frá.

Cooper, sem er 29 ára í dag, lýsir heimilislífinu sem frekar venjulegu, sérstaklega þegar foreldrar hans voru saman. Móðir hans er fyrirsætan Kimberley Conrad. Þau voru gift í níu ár.

„Þegar mamma og pabbi skildu keypti pabbi höllina við hliðina á og reif niður vegg svo ég og bróðir minn gætum flakkað á milli heimila eins og við vildum,“ segir hann.

Cooper segir að foreldrar hans hefðu verndað hann fyrir „fullorðinslegu“ hlutunum sem áttu sér stað í Playboy-höllinni.

„Mér finnst þetta frekar fyndið, því höllin er mjög þekkt og fólk leit á hana sem mekka kynsvalls. En fyrir mér var þetta eins konar Indiana Jones ævintýraheimur,“ segir hann og heldur áfram:

„Því þegar ég var ungur strákur þá var ekkert af þessu í gangi og ég var að synda í bakgarðinum og það var bara það sem ég var að gera.“

En skoðun hans á höllinni átti eftir að breytast þegar hann fór að eldast. Hann viðurkennir að þegar hann komst á unglingsárin hefði hann og vinir hans reynt að fá nasasjón af því sem var í gangi í alræmdu Playboy-veislunum.

„Okkur var haldið frá veislunum þegar við vorum yngri. Við fengum ekki að taka þátt þegar við vorum tólf ára. En eins og hver annar 13, 14 og 15 ára unglingur sem veit að foreldrar sínir eru að halda partý, þáá langar þig að kíkja niður og sjá hvað er í gangi og sjá af hverju þér er ekki boðið. Þannig já, ég átti nokkur svona kvöld með vinum mínum… Ég ætla ekki að tala frekar um það samt.“