Sylvía Haukdal Brynjarsdóttir prýðir forsíðuna á nýjasta tölublaði Vikunnar. Í blaðinu ræðir hún meðal annars um aðgerð sem hún fór í fyrir tveimur árum síðan, magaermisaðgerð.
„Þótt ég hafi alltaf rokkað upp og niður á vigtinni hef ég alltaf verið þung og of þung stærri hluta ævi minnar heldur en hitt. Ég var orðin 112 kíló og fann að þetta var farið að há mér mjög mikið, bæði andlega og líkamlega. Það sem ýtti hvað mest við mér var þegar dóttir mín sagðist vilja vera stór eins og mamma,“ segir Sylvía í viðtalinu í Vikunni.
„Þetta snerist aldrei um að verða grönn eða líta betur út“
Þegar Sylvíu fannst hún ekki vera góð fyrirmynd lengur, hvorki andlega og líkamlega, ákvað hún að skoða aðra möguleika til að missa kílóin. „Mig langaði að geta leikið við dætur mínar, hlaupið um með þeim, skriðið eftir gólfinu og verið með í fimleikum og allt þetta en ég gat það bara ekki eins og staðan var þarna,“ segir hún. „Ég var búin að prófa alla megrunarkúra sem voru til undir sólinni án árangurs en ég þekkti nokkrar konur sem höfðu farið í magaermi og náð góðum árangri sem var svona kveikjan að því að ég ákvað að fara sjálf í þá aðgerð.“
Sylvía segir að um hafi verið að ræða stóra ákvörðun en hún ætlaði að hætta við aðgerðina þegar hún var komin á skurðarborðið. Sylvía hætti þó ekki við aðgerðina að lokum en hún segir hana hafa bætt lífsgæði hennar til muna. „Þetta snerist aldrei um að verða grönn eða líta betur út, þótt það sé auðvitað plús, en mér líður svo miklu betur og það er æðislegt að geta gert það sem mig langar. Ég er líka góð fyrirmynd fyrir börnin mín með því að hafa tekið upp heilbrigðari lífsstíl almennt.“
„Mér leið kannski ekkert rosalega vel“
Þetta er ekki í fyrsta skipti sem Sylvía talar um þessa aðgerð í fjölmiðlum en hún gerði það einnig í Íslandi í dag í fyrra. Þar sagði Sylvía að hún hafi alltaf verið þung en að hún hafi fyrst farið í þriggja stafa tölu á vigtinni eftir meðgöngu. „Hægt og rólega kom þetta bara [í fæðingarorlofinu]. Maður var bara alltaf heima og ekkert að hugsa um hvað maður borðaði. Mér leið kannski ekkert rosalega vel,“ sagði Sylvía í Íslandi í dag.