Í nýju myndbandi frá samtökunum Stígamót greinir miðaldra maður frá kynferðisofbeldi sem hann varð fyrir 11 ára gamall. Póstburðarmaður lokkaði hann hann heim til sín til að gefa honum sælgæti og misnotaði hann kynferðislega.
Eftir ofbeldið hótaði maðurinn því að myrða drenginn ef hann segði frá með því að drekkja honum. Nokkrum mánuðum síðar fannst unglingspiltur látinn í Kópavogslaug og var umræddur maður bendlaður við dauða hans. Þetta jók enn á ótta piltsins.
Ofbeldið markaði líf mannsins, hann dró sig í skel, varð utanveltu og varð fyrir einelti. Er hann skilaði skömminni með hjálp Stígamóta urðu straumhvörf í lífi hans og honum fór smám saman að líða betur.
Stígamót hafa birt þetta myndband og fleiri reynslusögur á Facebook undanfarið sem hluta af átaki til að fjölga starfsfólki hjá samtökunum. Í texta undir myndbandinu segir:
„Við erum með um sjötíu manns á biðlista og þurfum að bæta við okkur starfsfólki til að bregðast við þessari aðsókn. Fylltu út formið ef þú vilt hjálpa.“
https://www.facebook.com/hafdis.jonsdottir.3/posts/10221686475025292
