Hlustendur Rásar 2 tóku eftir óvenjulegri bjórauglýsingu í gær sem hljóðaði svo „Áslaug athugaðu. Það þarf ekki alltaf að vera vín. Alvöru bjór með humrinum. Bríó áfengislaus.“ Er þar vísað til áfengisfrumvarps dómsmálaráðherra, Áslaugar Örnu Sigurbjörnsdóttur. Hefur nafn dómsmálaráðherra ekki verið dregið inn í auglýsingaherferðir með þessum hætti áður en fyrir skemmstu auglýst Geir Ólafsson tónleika með því að nefna Gísla Martein Baldursson á nafn.

Líkt og DV greindi frá fyrir skemmstu hyggst dómsmálaráðherra leggja fram frumvarp þar sem heimiluð verður sala áfengis í netverslunum. Slík sala er þegar lögleg um alla Evrópu og geta Íslendingar keypt áfengi af erlendum netverslunum og fengið sent heim að dyrum. Þá hefur Áslaug tilkynnt að í frumvarpinu verði einnig heimilið sala á öli á framleiðslustað. Yrði svokölluðum handverks brugghúsum, að ýmsum skilyrðum uppfylltum, heimilað að selja eigin framleiðslu í smásölu í brugghúsum sínum.

Önnur auglýsing fylgdi fast á eftir „Ungir sjálfstæðismenn athugið. Alvöru bjór er kominn í matvöruverslanir. Bríó áfengislaus“ Ölgerðin Egill Skallagrímsson rekur Borg brugghús og ber ábyrgð á auglýsingunum.

Þriðja auglýsingin hljómar á þessa leið „Þið getið hækkað áfengisgjöldin. Mér er alveg sama. Bríó áfengislaus.“