Nú styttist í að sjónvarpsþáttaserían Beforeigners verði frumsýnd hér á landi en norskir áhorfendur fengu smjörþef af seríunni fyrir stuttu. Leikkonan Ágústa Eva Erlendsdóttir fer með stórt hlutverk í þáttunum og segir á Facebook-síðu sinni vera pínu foj að Norðmenn hafi séð seríuna á undan henni. Íslenskir áhorfendur geta þó beðið spenntir því Netavisen í Noregi gefur þáttunum 9,1 af 10 mögulegum en þetta er í fyrsta skipti sem HBO framleiðir sjónvarpsþátt á Norðurlandatungumáli. Þættirnir verða sýndir um heim allan en alls fóru þrjú hundruð leikkonur á Norðurlöndum í prufu fyrir hlutverkið sem Ágústa Eva hreppti. Hún segir norskukunnáttu sína vafalaust hafa hjálpað, en hún er jafnframt fimur slagsmálahundur eftir að hafa æft bardagaíþróttir um langa hríð. Sagan gerist í Noregi og er að sögn Ágústu Evu ádeila á flóttamannavandann. Í þáttunum er töluð fornnorska sem líkist íslensku en Ágústa Eva segir seríuna vísindaskáldsögu sem hefjist þegar fólk frá víkingatímanum birtist upp úr sjónum og hefur líf með nútímafólki.