Hrafnhildur Rafnsdóttir, eða Hrafna eins og hún er betur þekkt, heldur úti vinsælli YouTube-rás. Hún er með yfir hundrað þúsund áskrifendur á miðlinum og gerir alls konar myndbönd um Ísland og íslensku.
Hrafna var í viðtali við DV fyrir stuttu og ræddi um YouTube ferilinn og hvernig henni tókst að komast á þann stað sem hún er á í dag.
Fyrir nýjasta myndband sitt bað Hrafna erlenda fylgjendur sína um að senda sér mýtur sem þeir hafa heyrt um Ísland. Í myndbandinu fer hún svo yfir mýturnar, og segir hvort þær séu sannar eða ekki.
Meðal þess sem haldið er um Ísland og Íslendinga er að við þurfum smáforrit (e. app) til að athuga hvort við séum skyld stefnumótinu okkar til að forðast sifjaspell. Aðrar mýtur voru að allar íslenskar konur séu fallegar, að Íslendingar elska að drekka og að við plönum aldrei neitt heldur erum við rosa spontant.
Myndbönd Hröfnu um Ísland hafa slegið í gegn á YouTube og hefur til að mynda eitt nýjasta myndband hennar fengið yfir 750 þúsund áhorf.
Horfðu á myndbandið um mýturnar um Ísland hér að neðan.
