Ég var í Snæfjallaströndinni við Ísafjarðardjúp í sumar og hreifst af fegurð svæðisins. Hugurinn leitaði til Sigvalda Stefánssonar læknis og tónskálds sem var fæddur í Grjótaþorpinu í Reykjavík í lok 19du aldar, lærði læknisfræði og fór til frekara náms til Kaupmannahafnar. Kom heim og gerðist læknir í Nauteyrarhreppi sem var eitt afskekktasta hérað landsins. Þá bjuggu nokkur hundruð manns á svæðinu sem síðan er að mestu farið í eyði. Sigvaldi var tónlistarmaður af Guðs náð og samdi mörg sinna þekktustu laga við texta eftir nágrannakonu sína Höllu Eyjólfsdóttur á Laugabóli og fleiri. Sveitungar Sigvalda keyptu handa honum flygel sem fluttur var á árabáti yfir Djúpið. Hann hreifst svo mjög af náttúrufegurðinni að hann kallaði sig alltaf Kaldalóns eftir stuttum firði í námunda við heimili sitt. Hann bjó í Ármúla þar sem enn er að finna gamlan meðalaskáp læknisins og orgelið hans.

Sigvaldi veiktist og varð að láta af störfum. Nokkru síðar lenti hann í útistöðum við læknafélögin vegna stöðuveitingar og átaka lækna við Jónas Jónsson frá Hriflu. Þeim átökum lauk með því að Sigvaldi var rekinn úr læknafélaginu. Hann fékk inngöngu nokkrum árum síðar en margir læknar fyrirgáfu Kaldalóns aldrei að hafa látið eigin heill og hamingju og fjölskyldu sinnar ganga fyrir hagsmunum læknaheildarinnar. Átökum Hriflu-Jónasar við læknasamtökin lauk með fullum sigri Jónasar. Sigvaldi settist að í Grindavík og átti farsælan feril.

Sigvaldi var frægasta tónskáld liðinnar aldar. Hann hefur þó fengið að sannreyna forgengileika frægðarinnar. Þegar tónskáldsins er leitað á vefmiðlum kemur fyrstur upp afkomandi hans og alnafni, Svali plötusnúður úti á Spáni. Tónskáldið sjálft er að gleymast eins og læknishéraðið harðbýla við Djúp sem fæstir þekkja lengur.