Auglýsingar og miðlun upplýsinga snýst fyrst og fremst um sköpunarkraftinn. Hvert verkefni er einstakt og miðlunarleiðirnar geta verið misjafnar. Hætta er á að fólk dreifi athyglinni of mikið og missi marks þegar kemur að markaðssetningu. Skammtímahugsunin í nútímasamfélagi þar sem árangur verður að nást strax getur komið niður á uppbyggingu vörumerkja til lengri tíma. Anna Kristín Kristjánsdóttir, formaður Samtaka íslenskra auglýsingastofa (SÍA), er gestur Ólafs Arnarsonar í hlaðvarpi Markaðarins á Eyjunni.
Anna Kristin Kristjansdottir - 2
„Við erum samt í grunninn alltaf að gera það sama. Við þurfum að finna innsæið hjá fólki; hvað er það sem hefur áhrif á það hvað þú velur eða hvað þú gerir og vinna út frá því. Þetta getur verið auðvitað að velja mismunandi miðla en þetta snýst og fyrst og fremst um sköpunarkraftinn og að finna leiðinni hvort sem það er með tilfinningatengingu eða einhverju óvæntu, eða hvað það er í hverju verkefni fyrir sig. Miðlunarleiðirnar koma inn vegna þess að það getur farið í gegnum áhrifavalda líka. Áhrifavaldar hafa alltaf verið til í einhverju formi, hverju nafni sem það kallast.“
Maður man bara eftir tóbaksauglýsingunum í Ameríku fyrir einhverjum áratugum þar sem læknar voru að mæla með tilteknum sígarettutegundum.
„Akkúrat. Við erum enn þá með lækna sem mæla með alls konar sem við erum kannski bara ekki búin að dæma óhollt í dag, þannig að í grunninn held ég að við breytumst ekki mikið,“ segir Anna Kristín.
Hún segir nútímamiðlunarleiðir vera gríðarlega margar og gæta verði þess að dreifa ekki athyglinni of víða og missa ekki marks. Það sé kannski stærsta áskorunin í þessu öllu, hvenær fólk átti sig á því að það hafi misst marks. Þó að það sé hægt að mæla allt þá ertu kannski ekki alltaf að mæla réttu hlutina. Svo lifum við í mjög miklu skammtímahugsunarsamfélagi þar sem allt þarf að gerast strax, árangur þarf að nást strax, en á sama tíma þá er ekkert vörumerki sem lifir til lengri tíma ef bara er horft til skemmri tíma.“
Einnig er hægt að hlusta á Spotify.
