DV.IS hefur tekið saman kosningaspá þremur dögum fyrir kjördag sem hér birtist. Spáin er unnin upp úr ýmsum upplýsingum og höfð hefur verið nokkur hliðsjón af birtum skoðanakönnunum, einkum könnunum Maskínu og Prósents. Auk þess hefur verið lagt mat á fyrirliggjandi staðreyndir og horfur.
Óvissan er mikil enn þá en talið er að stór hópur kjósenda, jafnvel 20 til 25 prósent, eigi enn eftir að ákveða sig. Sú kosningaspá sem hér er sett fram miðast við horfur eins og þær líta út núna þremur dögum fyrir kjördag.
Gangi þessi spá eftir og úrslit kosninga verða í líkingu við hana er mjög líklegt að mynduð verði þriggja flokka miðjustjórn Viðreisnar, Samfylkingar og Framsóknar.
Samkvæmt spánni fengi Viðreisn 14 þingmenn kjörna en þeir kæmu þrír úr hvoru Reykjavíkurkjördæmanna, fjórir úr Suðvesturkjördæmi, tveir úr Suðurkjördæmi og einn úr hvoru norðurkjördæmanna. Samfylkingin fengi einnig 14 þingmenn kjörna. Þrír kæmu úr Reykjavík norður, tveir úr Reykjavík suður, fjórir þingmenn úr Suðvesturkjördæmi, einn úr Norðvesturkjördæmi, tveir úr Norðausturkjördæmi og tveir úr Suðurkjördæmi. Samkvæmt kosningaspá okkar fengi Framsókn sex þingmenn kjörna. Ásmundur Einar Daðason næði kjöri í Reykjavík norður og Willum Þórsson einnig í Suðvesturkjördæmi. Ráðherrarnir Sigurður Ingi Jóhannsson og Lilja Alfreðsdóttir næðu hins vegar ekki kjöri. Framsókn fengi einn mann kjörinn í Norðvesturkjördæmi, tvo í Norðausturkjördæmi og einn í Suðurkjördæmi.
DV mun freista þess að spá í það hvernig ráðuneytum yrði skipt milli þessara þriggja flokka ef til kæmi og hverjir yrðu valdir til að gegna ráðherraembættum. Birtar verða upplýsingar um það síðar í dag.
SPÁ DV UM ÚRSLIT ALÞINGISKOSNINGA ÞANN 30.NÓVEMBER 2024 OG SKIPTAN ÞINGSÆTA:
Viðreisn ………………… 20,5% ……….. 14 þingmenn
Samfylking ……………. 19,0% ………… 14 þingmenn
Sjálfstæðisflokkur … 16,0% …………. 11 þingmenn
Miðflokkur ……………. 12,0% ………….. 9 þingmenn
Flokkur fólksins …….. 10,5% …………. 7 þingmenn
Framsókn ……………….. 9,0% …….…… 6 þingmenn
Píratar ……………………. 4,5% ………….. 1 þingmaður
Sósíalistar ………………. 4,5% ………….. 1 þingmaður
Vinstri græn ……………. 3,0% ………..
Aðrir ………………………. 1,0% ………..
…………………………… 100,0% ………… 63 þingmenn
