Samkvæmt síðustu mælingu er Bændablaðið mest lesna blað landsins. Blaðið er fjölbreytt og höfðar síður en svo eingöngu til bænda. Það liggur frammi á hundruðum staða um allt land, auk þess að vera dreift til áskrifenda og félagsmanna í Bændasamtökum Íslands. Hætt var dreifingu á öll lögbýli í landinu eftir að Pósturinn hækkaði fjöldreifinguna um tugi prósenta um áramót. Þá er prentkostnaður hár og engin samkeppni er á þeim markaði eftir að útgefandi Morgunblaðsins keypti prentsmiðju Fréttablaðsins og lét farga henni. Gunnar Þorgeirsson, formaður Bændasamtakanna er gestur Ólafs Arnarsonar í hlaðvarpi Markaðarins á Eyjunni.
Markaðurinn - Gunnar Þorgeirsson - 6.mp4
„Við erum gríðarlega stolt af þessu blaði. Þetta hefur bara þróast svona í gegnum árin. Blaðið er alltaf að verða umfangsmeira en það sem við höfum líka verið að ýta að er að hafa efnið fjölbreytt. Það sem kom okkur mest á óvart í síðustu könnuninni er að aldurshópurinn 18-27 ára er að stækka umtalsvert. Þetta er ekki gamalmennablað, þetta er fyrir alla,“ segir Gunnar.
Hann segir blaðið liggja frammi á 490 stöðum um allt land hjá sundlaugum, í sjoppum, bensínstöðvum og mjög víða. Síðan sé því dreift ókeypis til allra félagsmanna í Bændasamtökum Íslands. Einnig sé hægt að gerast áskrifandi að blaðinu og fá það sent heim. Þá sé það sent í pósti og áskriftargjöldin séu fyrir sendingunni en ekki blaðið sem slíkt.
Á síðasta ári og fram á þetta ár var Bændablaðinu einnig dreift á öll lögbýli á landinu en eftir að Pósturinn hækkaði fjöldreifinguna um áramótin um 60 prósent og Gunnar segir að við það hafi engin glóra verið í að senda blaðið svo víða. Gunnar segir áskrifendur vera orðna æði marga.
„Stefnan á blaðinu er sú að auglýsingar mega ekki fara yfir 40 prósent af skrifuðu efni og miðað við eftirspurn eftir auglýsingum gætum við verið með blaðið 100 síður á 14 daga fresti, en það kemur þá aftur niður á prentkostnaði og dreifingarkostnaði. Prentkostnaður hefur hækkað gríðarlega, hækkaði þegar stríðið byrjaði. Það var skortur á pappír og skortur á hinu og þessu þannig að það endaði á því að prentkostnaður hækkaði um 40 prósent, held ég. Svo er öll samkeppni horfin hér á landi. Árvakur keypti prentsmiðju Torgs og reif hana,“ segir Gunnar og bætir svo við:
„Ég er nefnilega prentari að uppruna.“
Já, ég vissi það ekki.
„Ég lærði offsetprentun þegar ég var ungur maður þannig að ég þekki þennan bransa ansi vel.“
Þið eruð miklu meira lesið blað en Morgunblaðið, svo ekki sé minnst á aðra prentmiðla.
„Blaðið kemur auðvitað bara út á 14 daga fresti og er ekki dagblað sem slíkt en það endist ansi vel hjá fólki. Maður skynjar það á fólki, alla vega þeim sem ég þekki, þeir taka þetta með sér í sumarbústaðinn og rýna þetta heila helgi og eina viku ef svo ber undir. Þetta er öðruvísi lesefni heldur en dagblað.“
Já, maður sér það. Dagblaðið er að keppa dálítið við netið og netið er nú oft búið að færa manni fréttirnar þannig að listin er að vera með eitthvað sem maður staldrar við. Ég fletti í gegnum þetta blað og ég mun taka það heim með mér og dunda mér í gegnum það.
„Það er gott að heyra,“ segir Gunnar og brosir.
