Fyrr í dag fór fram óundirbúinn fyrirspurnatími á Alþingi. Meðal þeirra ráðherra sem sátu fyrir svörum var Þórdís Kolbrún Reykfjörð Gylfadóttir fjármála- og efnahagsráðherra. Þorgerður Katrín Gunnarsdóttir, þingmaður og formaður Viðreisnar, spurði ráðherrann, sem tók við embættinu síðasta laugardag, út í hennar áherslur.

Þorgerður gerði ýmsar athugasemdir við störf ríkisstjórnarinnar, sakaði hana um lausatök og kallaði eftir auknum stöðugleika. Hún vísaði meðal annars í minnkandi kaupmátt. Þórdís sagði hins vegar ljóst að ekki hafi verið innistæða fyrir kauphækkunum undanfarinna ára og krónutöluhækkanir á launum ykju ekki stöðugleika.

Þorgerður Katrín sagði meðal annars í ræðu sinni:

„Ég vil draga fram að á þessum tímum hefur kaupmáttur ráðstöfunartekna lækkað núna fjóra ársfjórðunga í röð. … Við erum að sjá afborganir af lánum heimilanna fara úr 150.000 krónum í 350.000 krónum og vaxtakostnaður bænda stuðlar að því að þar er lítil sem engin nýliðun og mikil bugun þar í gangi. Litlu og meðalstóru fyrirtækin, nýsköpunarfyrirtækin, eru að bugast gagnvart þessum vaxtakostnaði og þessari krónuþreytu. En á meðan það átti að vera skjaldborg um heimilin þá slær ríkisstjórnin skjaldborgina um sig sjálfa.

Við í Viðreisn höfum ítrekað varað við þessum lausatökum og þessari þenslu.“

Í svari Þórdísar Kolbrúnar vísaði hún til kaupmáttaraukningar misseranna á undan skerðingum kaupmáttar á þessu ári:

„Hér skiptir auðvitað máli að halda því til haga þegar horft er á þróun kaupmáttar undanfarin misseri að við höfum verið með meiri kaupmáttaraukningu hér á landi í mörg ár heldur en bara, held ég, öll önnur lönd á byggðu bóli.“

Vék ráðherrann því næst að launahækkunum undanfarinna ára:

„Það má spyrja hvort það hafi verið innistæða fyrir þeim launahækkunum sem við höfum séð undanfarin ár. Ég held að svarið við því sé augljóslega nei. Við sem samfélag höfum komist upp með miklar launahækkanir í töluverðan tíma en nú er sá tími liðinn. Ef við meinum það þegar við segjum að við viljum tryggja stöðugleika og tryggja það að fjölskyldur geti greitt af sínum lánum og haldið í sína stöðu þá munu launahækkanir ekki leysa það með krónutölu heldur því að ná tökum á verðbólgu þannig að vaxtastigið lækki.“

Myndbönd með orðaskiptum Þorgerðar og Þórdísar má sjá hér fyrir neðan.

althingi-clip-1697712137