Tómas Ellert Tómasson, byggingarverkfræðingur, segir í grein sem hann ritaði á Vísi í dag staðfest dæmi um að við gerð fasteignamats næsta árs hafi Þjóðskrá Íslands, tekið fram fyrir hendur byggingafulltrúa sveitarfélaga og skráð nýbyggingar á hærra matsstig en þær eru í raun. Með þessu væri Þjóðskrá að fara gegn lögum þar sem skýrt komi fram að það sé verk byggingafulltrúa að sjá um slíkar skráningar.

DV sendi fyrirspurn á Þjóðskrá vegna málsins og var þar vísað á húsnæðis- og mannvirkjastofnun (HMS) sem nú fer með fasteignamat. Í svörum framkvæmdastjóra HMS, Tryggva Más Ingvarssonar, segir að grein Tómasar byggi á misskilningi.

„Greinin byggir á misskilningi sem þarf að leiðrétta. Í henni er ekki gerður greinarmunur á byggingarstigi annars vegar og matsstigi hins vegar. Byggingarstigi er á forræði og ábyrgð sveitarfélaga og endurspeglar stjórnsýslu í mannvirkjamálum, þ.e. leyfisveitingar fyrir mannvirkjagerð og úttektir á framkvæmdum.

Matsstig er annað, það er notað við gerð fasteignamats og lýsir raunverulegri stöðu fasteignar, óháð eftirliti byggingarfulltrúa. Oftast er staða byggingarstigs og matsstigs hin sama, en það er ekki alltaf reyndin. Þannig getur verið mismunur t.d. ef íbúð hefur verið tekin í notkun áður en lokaúttekt fer fram þá er eignin skráð með hærra matsstig en byggingarstig.

Telji eigendur fasteigna þær upplýsingar sem liggja til grundvallar fasteignamati ekki réttar geta þeir óskað eftir endurskoðun matsins.“

Sjá einnig: Sakar Þjóðskrá um að hafa gripið fram fyrir hendur byggingarfulltrúa við gerð fasteignamats 2023