Eva Bryndís Helgadóttir, formaður yfirkjörstjórnar í Reykjavík, sagði í samtali við fréttastofu RÚV að orð standi gegn orði varðandi meinta undirskrift Birgittu Jónsdóttur á framboðsgögnum E-listans, sem heitir réttu nafni Reykjavík; besta borgin. Yfirkjörstjórn hafi vísað málinu til héraðssaksóknara en ekki sé unnt að fjarlægja nafn Birgittu af atkvæðaseðlum.
Yfirkjörstjórn fundaði með málsaðilum í hádeginu þar sem farið var yfir málið. Eva Bryndís segir að í kjölfar fundar hafi verið ákveðið að vísa málinu til héraðsaksóknara. Ekki er þó hægt að fjarlægja nafn Birgittu af atkvæðaseðlum þar sem yfirkjörstjórn þarf að hafa seðlana tilbúna sjö dögum fyrir kjördag. Þeim verði því ekki breytt úr þessu.
Eva segir umboðsmenn E-listans ekki kannast við að fölsun hafi átt sér stað en þeir muni rannsaka málið. Birgitta standi við það að þetta sé ekki hennar undirskrift. „Þetta er bara orð á móti orði,“ sagði Eva svo að lokum.
Birgitta hefur greint frá því að hún hafi skrifað undir meðmælendalista fyrir flokkinn í vetur. Hélt hún fyrst að um misskilning vegna þess væri að ræða. Skjalið sem inniheldur undirskrift hennar sem frambjóðanda hafi hún þó aldrei undirritað.
E-listinn sendi frá sér yfirlýsingu í morgun þar sem kemur fram að framboðið telji sig ekki vera í aðstöðu til að meta fullyrðingu Birgittu um fölsun og sé nú rannsókn hafin innan flokksins á meðferð gagna sem skilað var til yfirkjörstjórnar í apríl. Framboðið segist harma umræðuna um undirskriftina og segja óánægju Birgittu hafa komið þeim á óvart.
Birgitta skrifaði um málið í gær á Facebook-síðu sinni. Þar segir:
„Skil ekki hvað þeim gengur til að gangast ekki við þess. Það er svo augljóst að þetta er ekki undirskrift mín á þessu skjali. Það er ekki mikið mál fyrir sérfræðing í rithönd að skera úr um það. Ömurlegt í alla staði og ég hefði með sanni vonast til að um handvömm hefði verið að ræða en með þessari frétt má sjá að um einbeittan brotavilja er um að ræða. Dapurlegt. Hefði aldrei trúað þessu upp á þá félaga. Hélt að þetta væru vandaðir menn.“
Með færslunni vísar Birgitta til fréttar RÚV af málinu þar sem frambjóðandi E-listans sagði flokkinn hafa verið í góðri trú og viðraði þann möguleika að undirskriftin væri ekki fölsuð.
