Úkraína er ekki aðili að NATO og því eru aðildarríki NATO ekki skuldbundin til að koma landinu til aðstoðar ef Rússar ráðast á það. En NATO býr sig samt sem áður undir átök og er nú að efla styrk sinn í austurhluta álfunnar. Fjögur NATO-ríki eiga landamæri að Úkraínu en það eru Pólland, Slóvakía, Ungverjaland og Rúmenía.
Danir hafa til dæmis sent F-16 þotur til Eystrasaltsríkjanna til eftirlits með lofthelgi þeirra. Franskir hermenn hafa verið sendir til Rúmeníu og styrkja þar með liðsafla NATO þar í landi. Einnig hafa Spánverjar sent skip og flugvélar í austurátt. Þetta er auðvitað gert til að vara Rússa við og sýna að NATO sé reiðubúið til að verja bandalagsríkin ef til stríðs kemur í Úkraínu og það breiðist út til annarra ríkja.
Bandaríkin hafa sett 8.500 hermenn í viðbragðsstöðu og segjast reiðubúin að láta þá fara undir stjórn „Response Force“ NATO en það er alþjóðleg hersveit með um 40.000 hermenn. Hún gæti styrkt NATO í Austur-Evrópu mikið. Bandaríkin eru einnig tilbúin til að senda fleiri hermenn og hernaðartól til Evrópu ef þörf krefur.
Dmitrij Peskov, talsmaður Pútíns, sagði nýlega að Vesturlönd væru „móðursjúk“. Aðgerðir og talsmáti NATO geri ekkert annað en að auka spennuna.
Írar, sem eru ekki aðilar að NATO, hafa áhyggjur af vaxandi umsvifum rússneska flotans í vesturhluta álfunnar. Rússar hafa í hyggju að halda flotaæfingu með stuðningi úr lofti 240 km frá suðvesturströnd Írlands í byrjun febrúar. Bretar hafa áður varað við því að þar geti Rússar verið ógn við neðansjávarstrengi sem tryggja netsamband og fjarskipti á milli Evrópu og Bandaríkjanna.
