Það fór varla framhjá mörgum á dögunum þegar Páll Vilhjálmsson, kennari og bloggari, skrifaði pistil um Helga Seljan, fréttamann hjá RÚV, og andleg veikindi hans og innlögn á geðdeild. Mátti skilja skrif Páls svo að hann telji að þar sem Helgi hefði glímt við andleg veikindi þá væri hann ófær um að sinna starfi rannsóknarblaðamanns og hugsanlega hvaða starfi sem er.

Þessi skrif Páls eru umfjöllunarefni Kolbrúnar Bergþórsdóttur í leiðara Fréttablaðsins í dag sem ber fyrirsögnina „Smásálarhroði“. Þar segir hún að ekki sé hægt að skapa gott samfélag með refsigleði að vopni. „Ákæra á til dæmis ekki að jafngilda sekt og fólk sem segir fáránlega, jafnvel hræðilega hluti, á ekki sjálfkrafa að missa atvinnu sína og lífsafkomu. Í samtíma okkar sjáum við þó ríka hneigð í þessa átt. Refsigleðin er grasserandi og hinn alræmdi dómstóll götunnar telur hana sjálfsagða og eðlilega og réttlætir hana auðveldlega með því að tilgangurinn sé að uppræta illsku og fordóma, sem við viljum náttúrlega ekki búa við,“ segir Kolbrún og bætir við að ekki sé sama hvernig hlutirnir eru gerðir.

Sá sem sé sakaður um alvarlegt brot verði að fá tækifæri til að svara ásökunum þar um í stað þess að vera strax kýldur niður og rúinn ærunni.

„Sá sem talar dólgslega á svo sannarlega skilið að honum sé svarað, en á ekki að þurfa að þola það að vera rekinn úr starfi,“ segir hún og víkur að skrifum Páls um Helga Seljan. Hún segir að helst hafi mátt ráða af skrifum Páls að ekkert mark væri á Helga takandi og að einnig hafi hann talið að skýringin væri fundin á af hverju Helgi gekk svo vasklega fram við rannsókn á málum Samherja, hann væri haldinn þráhyggju.

„Tíminn og orkan sem ákveðnir starfsmenn Samherja hafa eytt í að ata Helga auri, og leggja hann í einelti og vakta ferðir hans, var hins vegar ekki til umfjöllunar hjá Páli. Kannski finnst honum þær aðferðir hafa verið í góðu lagi. Ef svo er þá er það dæmi um afar sérkennilegt hugarfar,“ segir hún.

Hún víkur síðan næst að starfi Páls sem kennara en hann kennir við Fjölbrautaskólann í Garðabæ. „Páll starfar enn sem kennari, þrátt fyrir skrif sín um Helga Seljan. Einhverjir vildu að hann yrði rekinn úr starfi vegna þeirra. Skólameistari skólans, sem Páll starfar við, er afar ósáttur við skrif hans og gerir athugasemdir við þau, en telur rétt að Páll haldi starfinu. Það er skynsamleg afstaða. Við búum í landi þar sem tjáningarfrelsi á að vera ríkjandi. Páll nýtur þess, eins og hann á að gera. Ekkert breytir því þó að skrif hans um Helga Seljan séu honum til skammar. Þingmaður Samfylkingarinnar, Helga Vala Helgadóttir, orðaði þetta af nákvæmni þegar hún sagði um þau skrif: „Þetta er nú meiri smásálarhroðinn.““