Friðjón R. Friðjónsson, almannatengill og varaþingmaður Sjálfstæðisflokksins, segir að allt stefni í opið prófkjör hjá Sjálfstæðisflokknum í borginni fyrir borgar- og sveitarstjórnarkosningarnar í vor.
Þetta kemur fram í hlaðvarpi Þjóðmála en hlýða má á þáttinn hér að neðan. Friðjón víkur að þessu í lok þáttarins en einnig skeggræða hann, Andrés Jónsson almannatengill og Gísli Freyr Valdórsson, ritstjóri Þjóðmála, um stjórnarmyndunarviðræðurnar sem nú standa yfir.
Eyþór Arnalds, núverandi oddviti Sjálfstæðismanna í borginni, hefur fengið á sig palladóma þess efnis að hann sé ekki nægilega sterkur leiðtogi. Hann hefur þó bent á að meirihlutinn í borginni hafi í raun verið felldur í síðustu kosningum en Viðreisn kaus að ganga til samstarfs við Samfylkinguna, Vinstri græn og Pírata. Margir Sjálfstæðismenn telja þó flokkinn fiska ekki nægilega vel á miðum kjósenda í borginni en í skoðanakönnun sem Gallup birti í mars á þessu ári fékk flokkurinn 25,2% eða 5,6% minna en í kosningunum 2018.
„Mér heyrist það að umræðan í Verði, fulltrúaráði Sjálfstæðisfélaganna í Reykjavík, að það verði prókjör – tímasetninguna veit ég ekki – og það verði bara venjulegt opið prófkjör, ekki leiðtogaprófkjör. Það verður mjög áhugavert,“ segir Friðjón og fer ekki leynt með hvern hann vill sjá sem borgarstjóraefni Sjálfstæðisflokksins:
„Ég vona að Hildur Björnsdóttir taki slaginn um oddvitasætið. Ég mun styðja hana til þess og ætla að kjósa hana ef hún gefur kost á sér,“ segir Friðjón.
„Þú sprengir allt upp í loft upp hér í lokin,“ segir hlaðvarpsstjórinn Gísli þá og vekur athugasemdin hlátur.
DV hafði samband við Hildi og spurði hvort hún stefndi á leiðtogasætið. Hún telur spurninguna ekki tímabæra þar sem ekki sé búið að taka ákvörðun um hvort prófkjör verður haldið í borginni:
„Prófkjör hefur ekki formlega verið auglýst innan Sjálfstæðisflokksins svo það er ótímabært að ræða tiltekin sæti. Ég mun hins vegar gefa kost á mér til áframhaldandi setu í borgarstjórn og taka slaginn fyrir frjálst, réttlátt samfélag sem byggir á jöfnum tækifærum. Fjölskylduvænni framfaraborg sem vinnur fyrir fólk.“
Þess má geta að Hildur hefur opnað nýja vefsíðu þar sem hún kynnir til leiks fjölbreyttar hugmyndir sínar um borgina. „Á næstu dögum mun ég kynna til leiks þrjátíu fjölbreyttar hugmyndir að betri, fjölskylduvænni og skemmtilegri höfuðborg. Þið fáið tækifæri til að segja ykkar skoðun – hvort hugmyndunum skuli gleyma eða þær geyma,“ segir hún í kynningu á síðunni á Facebook-síðu sinni.
