Yfirkjörstjórn Suðurkjördæmis hefur ákveðið að endurtelja atkvæði sem greidd voru í kjördæminu í alþingiskosningunum. RÚV greinir frá.
VG, Píratar, Sjálfstæðisflokkur og Viðreisn kölluðu eftir endurtalningu vegna þess hve mjótt var á munum milli VG og Miðflokksins, en aðeins munaði sjö atkvæðum á fulltrúum flokkanna.
Þórir Haraldsson, formaður yfirkjörstjórnar, segir að ákveðið hafi verið að gera þetta þó að lög kveði ekki á um það: „Okkur þótti rétt að gera þetta þótt það sé umfram lagaskyldu. Og þetta lýsir engu vantrausti á hendur starfsfólki sem hefur unnið af miklum heilindum,“ segir hann.
Talningin fer fram í Fjölbrautarskóla Suðurlands á Selfossi í dag.