Fáir virðast vera að nýta sér úrræði stjórnvalda um að fá séreignarsparnað sinn greiddan út. Tölur benda til að almennt sé fólk að sækja um heldur lágar fjárhæðir.

„Þetta er varhugavert því séreignarsparnaðurinn er hugsaður sem eftirlaun. Miðað við þessar tölur virðast þeir sem eiga lítinn séreignarsparnað helst vera að taka hann út.“

Hefur Fréttablaðið eftir Þóreyju S. Þórðardóttur, framkvæmdastjóra Landssamtaka lífeyrissjóða, um útgreiðslurnar. Blaðið fjallar um málið í dag.

Tímabundin heimild til útgreiðslu séreignarsparnaðar er eitt þeirra úrræða sem stjórnvöld hafa gripið til vegna efnahagsáhrifa COVID-19. Samkvæmt heimildinni, sem Alþingi samþykkti í lok mars, getur hver einstaklingur fengið allt að 12 milljónir greiddar úr séreign sinni.

Fréttablaðið leitaði upplýsinga hjá lífeyrissjóðum og öðrum vörsluaðilum séreignarsparnaðar um nýtingu þessa úrræðis. Svör fengust frá aðilum sem ráða samtals yfir rúmlega 80% heildareigna séreignarsparnaðar. Miðað við þau svör sem fengust þá virðist sem langflestar umsóknir séu talsvert undir hámarkinu.

Hjá Gildi lífeyrissjóði var meðalupphæð umsókna tæplega 400.000 krónur. Hjá Lífeyrissjóði verslunarmanna var meðaltalið tæplega 800.000 krónur og örlítið hærra hjá Stapa. Hjá LSR var meðalupphæðin um 1,7 milljónir og rúmlega tvær milljónir hjá Almenna lífeyrissjóðnum.