Staksteinahöfundur Morgunblaðsins er gamansamur í dag og fer með prýðilega skrýtlu. Miðað við efni og stíl hennar er ástæða til að velta fyrir sér hvort þar haldi Davíð Oddsson ritstjóri um pennann, en gamansemi hans er margrómuð, þó svo sum Reykjavíkurbréf hans hafi mörgum þótt heldur súr.

Staksteinhöfundur skrifar:

„Á hverju hausti berast fréttir af skógareldum sem engu eira og skilja eftir sig sviðna jörð á stórum svæðum í Kaliforníu. Við þessi ömurlegu og háskalegu tilþrif náttúrunnar bætist svo að yfirvöld standa fyrir manngerðu rafmagnsleysi sem náð hefur til milljóna manna, en rafmagn er tekið af þar sem óttast er að á þurrkatíð geti neistar frá rafmagnslínum kveikt nýja elda.

Síðustu daga var sagt frá ótta um að skógareldar næðu að Minningasetri og bókasafni um Ronald Reagan Bandaríkjaforseta og áður ríkisstjóra í Kaliforníu. En loks komu þá góðar fréttir:

„Svöng 500 geita hjörð hjálpaði til við að bjarga bókasafni Ronalds Reagans, fyrrverandi forseta Bandaríkjanna, frá því að verða eldsmatur í einum af þeim ótal eldsvoðum sem nú geisa í Kaliforníu í Bandaríkjunum.“ BBC greinir frá þessu.  Í maí síðastliðnum réðu forsvarsmenn bókasafnsins geiturnar til að fjarlægja eldfimt kjarr sem var áður umhverfis safnið. Var það gert í forvarnaskyni. Geiturnar átu kjarrið og því varð til rjóður sem hefti útbreiðslu eldsins og gaf slökkviliðsmönnum lengri tíma til að bregðast við.“

Getgátur eru um það að forráðamenn bókasafns um Richard Nixon forseta muni fylgja þessu vel heppnaða fordæmi. Þeir munu þegar vera farnir að leita að heppilegum geitastofni og mun watergeitin koma sterklega til álita.“