Áslaug Arna Sigurbjörnsdóttir, nýskipaður dómsmálaráðherra segir að ekkert hafi komið fram sem bendi til þess að spilling sé útbreidd innan lögreglunnar. Þetta kom fram í óundirbúnum fyrirspurnum á Alþingi í dag og bætir hún við að Haraldi Johannessen ríkislögreglustjóri njóti fulls trausts en þó sé óásættanlegt ástand innan lögreglunnar.
Guðmundur Andri Thorsson, þingmaður Samfylkingarinnar, vísaði í dag í viðtal við Harald, sem birtist í Morgunblaðinu um helgina. Þar lýsti Haraldur meintri rógsherferð gegn sér, óhæfum starfsmönnum lögreglunnar og spillingu innan hennar. Áslaug segist nú hafa rætt við ríkislögreglustjóra um undirmenn hans og telur brýnt að svona mál verði ekki leyst í fjölmiðlum.
„Það er auðvitað óhjákvæmlegt þegar embættismaður eins og ríkislögreglustjóri lýsi því að það ríki spilling innan lögreglunnar, að það sé brugðist við slíkum yfirlýsingum,“ segir Áslaug. „En það hefur ekkert komið fram sem bendir til þess að spilling sé útbreidd innan lögreglunnar. Það er mikilvægt að hafa í huga að innan lögreglunnar er unnið mikið og gott starf.“
Samkvæmt kvöldfréttum Stöðvar 2 eru starfslok til skoðunar hjá Haraldi en hann neitar því í viðtalinu.