Áslaug Arna Sigurbjörnsdóttir, hinn ungi dómsmálaráðherra, fær það verk upp í hendurnar að reyna að slökkva elda innan lögreglunnar. Það verður hennar fyrsta prófraun.

Eldarnir loga glatt eftir viðtalið við Harald Johannessen ríkislögreglustjóra í Morgunblaðinu um helgina. Það getur jafnvel hugsast að þar hafi hann talað sig út úr embættinu. Lögreglumenn sætta sig varla við tal Haraldar um óhæfa starfsmenn, valdabaráttu bak við tjöldin og orð þess efnis að spilling viðgangist innan lögreglunnar.

Þetta eru býsna þung – og óvænt – orð komandi frá manni í svo háu embætti.

Það kannski gerir róðurinn þyngri fyrir Áslaugu Örnu að löngum hefur verið litið svo á að Haraldur hafi setið undir verndarvæng Sjálfstæðisflokksins. Hann er innvígður, ef svo má að orði komast. Þetta er þó ekki alveg svo einfalt, því það var Ögmundur Jónasson sem skipaði Harald þegar hann var dómsmálaráðherra á tíma vinstri stjórnar Jóhönnu – þá stóð styrr um Harald líkt og nú.