Albertína Friðbjörg Elíasdóttir, þingmaður Samfylkingarinnar, hefur fengið svör frá öllum ráðherrum nema einum, við fyrirspurnum sínum um kynjaskiptingu í stjórnum, ráðum og nefndum á málefnasviði hvers ráðherra fyrir sig. Aðeins mennta- og menningarmálaráðherra hefur ekki svarað fyrirspurn Albertínu.
Í svari frá samgöngu – og sveitarstjórnarráðuneytinu kemur í ljós að aðeins 39 prósent ráða, stjórna og nefnda ráðuneytisins er skipað konum. Í jafnréttislögum er kveðið á um að hlutfallið skuli ekki fara undir 40%:
„Mér finnst þetta ógeðslega lélegt, lögin eru alveg skýr hvað þetta varðar. Í ljósi allrar umræðu hefði ég nú vonað að ráðuneytin gættu sín betur hvað þetta varðar. Ég vonaði innilega að þetta væri í lagi, en þetta sýnir að umræðan er ekki nóg, það er mikilvægt að vera alltaf með kynjagleraugun á sér og stanslaust á tánum. Það er alveg fáránlegt að ráðuneytið sé að brjóta jafnréttislög og alls ekki til fyrirmyndar,“
sagði Albertína við Eyjuna. Hún segir önnur ráðuneyti einnig mega taka sig á:
„Ég óskaði eftir þessum upplýsingum frá öllum ráðherrum, þar sem ég hafði á tilfinningunni að það væri pottur brotinn og einnig til að vekja ráðherra til umhugsunar um málefnið, því það eru auðvitað jafnréttislög í landinu sem ber að fara eftir. Þegar svörin eru skoðuð kemur í ljóst að það eru nokkur ráðuneyti sem þurfa að taka sig á.“
Samkvæmt jafnréttislögum skal hlutfall kynjanna vera sem jafnast þegar kemur að þátttöku í nefndum, ráðum og stjórnum hins opinbera og ekki undir 40%
Því er ljóst að lögin eru brotin í samgöngu- og sveitarstjórnarráðuneytinu, en þar er hlutfall kvenna aðeins 39%:
Katrín Björg Ríkarðsdóttir, framkvæmdarstjóri Jafnréttisstofu, segir ætla að láta lögfræðing kanna málið strax á morgun, en fyrst þurfti að kalla eftir meiri upplýsingum:
„Jafnréttisstofa hefur heimild til að beita dagsektum, sem snýr aðallega að því sem lýtur að afhendingu gagna frá fyrirtækjum og stofnunum. Þarna eru upplýsingar vissulega afhentar, en ég þyrfti að fá lögfræðing Jafnréttisstofu til að athuga þetta í fyrramálið. En fyrst þarf að kalla eftir nánari upplýsingum um hvort það séu málefnalegar ástæður fyrir þessari skekkju, eins og undanþáguákvæðin kveða á um. Það eru vissulega vonbrigði að vinnulag um rétta nefndarskipan sé ekki að festast í sessi, þar sem þróunin hefur verið nokkuð jákvæð á síðustu árum. En það er auðvitað mikilvægt þegar lög eru sett, að eftir þeim sé farið.“
Þau ráðuneyti sem finna má mesta kynjahallann eru:
Samgöngu – og sveitarstjórnarráðuneytið með 61 % karla og 39% konur. Þar af er ein nefnd, Skipulagsnefnd Keflavíkurflugvallar, ekki skipuð neinni konu og í ellefu nefndum er aðeins ein kona.
Félags- og jafnréttismálaráðuneytið (verkefnaskipaðar nefndir), þar sem konur eru 58% og karlar 42%
Þá eru lögbundnar nefndir í fjármála- og efnahagsráðuneytinu skipaðar 60% körlum og 40% konum.
Dæmið snýst við í verkefnaskipuðum nefndum í heilbrigðisráðuneytinu eða um 60% konur og 40% karlar.
Þá er hlutfallið 60% karlar og 40% konur í sjávarútvegs – og landbúnaðarráðuneytinu.
Ráðherra/Ráðuneyti Konur Karlar
Félags- og jafnréttismálaráðherra – Lögbundnar nefndir | 50,7 | 49,3 |
Félags- og jafnréttismálaráðherra – Verkefnaskipaðar nefndir | 58 | 42 |
Forsætisráðuneyti | 51 | 49 |
Fjármála- og efnahagsráðherra – Lögbundnar nefndir | 40 | 60 |
Fjármála- og efnahagsráðherra – Verkefnaskipaðar nefndir | 46 | 54 |
Dómsmálaráðherra | 47 | 53 |
Samgöngu- og sveitarstjórnarráðherra | 39 | 61 |
Heilbrigðisráðherra – lögbundnar | 54,7 | 45,3 |
Heilbrigðisráðherra – verkefna | 59,7 | 40,3 |
Ferðamála, iðnaðar og nýsköpunar | 49,1 | 50,9 |
Sjávarútvegs- og landbúnaðar | 40 | 60 |
Umhverfis- og auðlinda | 48 | 52 |
Utanríkisráðherra | 52 | 48 |
Mennta- og menningarmálaráðherra | Hefur ekki svarað |