Vísir greinir frá því að Inga Sæland formaður Flokks fólksins mætti á Bessastaði í bíl með Sigmundi Davíð Gunnlaugssyni formanni Miðflokksins. Á meðan Sigmundur ræddi við Guðna Th. Jóhannesson forseta Íslands sat Inga Sæland aftur í bílnum. Inga á ekki að mæta á fund hjá Guðna fyrr en klukkan 16. Eyjan heyrði í Ingu sem var enn í skýjunum eftir úrslit gærdagsins. Aðspurð um veru sína í aftursæti Sigmundar segir hún:

„Við vorum að spjalla saman. Ég var að koma af öðrum fundi og fékk far með Sigmundi. Þessi kona er ekki með bílpróf og hann bauðst til að skutla mér með smá krók,“ segir Inga glettin.

Stefnið þið á að vinna saman eftir kosningar?

„Við höfum spjallað saman og átt óformlegar viðræður eins og aðrir flokkar. Er það ekki pólitík“

Stefnir Flokkur fólksins á að komast í ríkisstjórn?

„Við útilokum ekkert. Á þessari stundu getum við aðeins lofað því að við munum berjast fyrir okkar hugsjónum, fyrir fólkið í landinu.“