„Ég kveð þingið eftir 12 mánuði í draumastarfinu,“ segir Pawel Bartoszek, fyrrverandi þingmaður Viðreisnar, sem missti sæti sitt í þingkosningunum í gær. Pawel gerir síðustu tólf mánuði upp í pistli á Facebook-síðu sinni.

Pawel rifjar upp að hann hafi samið fjögur frumvörp. „Það er slatti í samanburði við aðra. Þrjú fjölluðu um innflytjendamál. Það fjórða var kannabisfrumvarpið,“ segir hann og bætir við að enginn óbreyttur stjórnarliði hafi tekið oftar til máls eða talað lengur.

Þessi tölfræði sé þó ekki aðalatriðið. Eitt sitji eftir sem hann hefur lært um sjálfan sig.

„Ég hef unun að því að leita sátta. Að fá mál sem virðist í algerum hnút, setjast niður með þingmönnum ólíkra flokka, sjá hvað hver vill, leita lausna, skýra hvað sé hægt og hvað ekki. Tilfinningin er svipuð og að aftengja sprengju. En eins og í því dæmi þá er það bara frétt þegar það mistekst. Ekki þegar það tekst,“ segir hann.

Hann segir að þingmannsstarfið sé ótrúlega valdamikið starf. „Þeir sem veljast til þess fá að ráða hvað sé leyft og hvað sé bannað, hve mikinn pening eigi að taka af fólki og hvað eigi að nota hann í. Þetta vald hafa þingmenn og þingmenn einir. Ég óska þeim sem til þess völdust, innan Viðreisnar sem utan, innilega til hamingju.“

Pawel endar pistilinn á að þeim orðum að vissulega sé hann svekktur yfir að hafa fengið að dvelja í starfinu lengur. Sú tilfinning sé þó léttvæg í samanburði við það þakklæti sem er honum í huga fyrir að hafa fengið að gegna því til að byrja með.