Það er nánast sama hvar borið er niður, efnahagur Íslendinga er sterkur. Og umbreytingin er ævintýraleg á innan við áratug. Íslensk heimili standa miklu sterkari nú en áður, sem byggist einkum á tvennu; hér er næg atvinna og verðbólga hefur haldist lág. Leiða má líkum að því að hið fyrrnefnda haldist áfram fái fyrirtæki að dafna í stöðugu umhverfi án átaka. Hið síðara, verðbólgan, getur líka haldist í þeim góða farvegi sem hún er ef við stígum varlega til jarðar og viðhöldum stöðugleika í efnhagsmálum.

En það ber ýmislegt að varast við stjórn efnahagsmála, líka í góðæri. Þannig er ljóst að hagvöxtur er að mestu borinn uppi af einkaaðilum nú um stundir, og á meðan svo er ættu opinberir aðilar, bæði sveitarfélög og ríkið, að halda að sér höndum. Með mikilli innspýtingu inn í hagkerfið myndi þrýstingurinn aukast á verðbólgu, sem svo kallar á aðgerðir Seðlabankans, sem strax myndi hækka vexti. Þetta verðum við að forðast, og því verðum við að sýna yfirvegun við ákvarðanir um aukin fjárútlát hins opinbera.

Hann er þröngur, gullni meðalvegurinn, en hann má samt rata með góðum hætti. Það hefur Sjálfstæðisflokkurinn sýnt með stefnu sinni og gjörðum að undanförnu. Stíga verður skrefin áfram þann veg. Þannig er ljóst að ríkið verður að setja fjármuni í viðhald og frekari uppbyggingu innviðanna, svo sem vegagerð. Okkur er líka ljóst að bæta verður úr húsnæðisþörf eldra fólks með hraðri uppbyggingu hjúkrunarheimila. Mörg ágæt skref hafa verið tekin í þeim málum á fáeinum árum, en gera má betur. Brýnt er að halda áfram endurnýjun tækjabúnaðar á Landspítalanum og styrkja þarf heilbrigðiskerfið um land allt. Hið sama á við menntakerfið. Sjálfstæðisflokkurinn hefur bent á að fjármunir séu til staðar, bankar hafi bolmagn til að greiða allt að 100 milljarða króna í sérstakar arðgreiðslur á næstu árum sem nýta má í umræddar framkvæmdir, án þess að stofna til spennu í hagkerfinu og án þess að hækka hér skatta.

Sígandi lukka er best, og stuðningur við framboð Sjálfstæðisflokksins á laugardaginn er stutt en mikilvægt skref til þess að viðhalda festu og stöðugleika í efnahagsmálum, til farsældar fyrir land og þjóð.

Höfundur greinar: Unnur Brá Konráðsdóttir, forseti Alþingis, skipar 4. sæti á framboðslista Sjálfstæðisflokkins í Suðurkjördæmi.