Vinstri græn og Sjálfstæðisflokkur mælast með langmest fylgi, samkvæmt nýjum Þjóðarpúlsi Gallup. Fjallað var um hann í kvöldfréttum RÚV.
Vinstri græn mældust með rúmlega 23 prósenta fylgi á meðan Sjálfstæðisflokkur mældist með tæplega 23 prósenta fylgi. Í niðurstöðum könnunar sem MMR birti í vikunni var fylgi Sjálfstæðisflokks 19,9 prósent en fylgi Vinstri grænna 19,1 prósent.
Samfylkingin mælist með rúmlega þrettán prósenta fylgi og Píratar tæplega ellefu prósent. Miðflokkurinn mælist með rúmlega níu prósenta fylgi og fylgi Framsóknarflokksins er rúm sjö prósent. Viðreisn og Flokkur fólksins koma þar á eftir með tæplega sex prósenta fylgi.
Stuðningur við Bjarta framtíð, flokkinn sem sleit stjórnarsamstarfinu í haust, mælist rúmlega eitt prósent og næði ekki manni inn á þing.
Í fréttum RÚV kom fram að ef niðurstaða kosninganna yrði svona fengju Sjálfstæðisflokkur og Vinstri græn fimmtán þingmenn kjörna. Samfylkingin fengi níu þingmenn, Píratar sjö, Miðflokkurinn fengi sex, Framsóknarflokkur fengi fimm þingmenn og Viðreisn og Flokkur fólksins þrjá þingmenn hvor flokkur.
Könnunin var framkvæmd dagana 13. til 19. október og var úrtakið 2.870 manns. Þátttökuhlutfallið var 59,2 prósent.
