„Ég er enginn talsmaður þess að það verði sett lög á vinnudeilur af þessu tagi. Ég er hins vegar svo raunsær að ég vil ekki útiloka það að ríkið kunni að þurfa að grípa inn í þetta með einhverjum hætti og það er hægt með öðrum hætti heldur en með lagasetningu.“

Þetta sagði Páll Magnússon þingmaður Sjálfstæðisflokksins og formaður atvinnuveganefndar Alþingis í Morgunútvarpinu á Rás 2 í morgun. Gunnar Bragi Sveinsson þingmaður Framsóknarflokksins og fyrrverandi ráðherra sjávarútvegsmála tók undir með Páli og segir fordæmi fyrir því að stjórnvöld liðki fyrir um kjaradeilur án lagassetningar, til dæmis með breytingum á skattkerfinu eða með sjómannaafslætti.

Þorgerður Katrín Gunnarsdóttir sjávarútvegs- og landbúnaðarráðherra hefur útilokað lagasetningu og hefur sagt það sjómanna og útgerðarmanna að leysa kjaradeiluna.Bjarni Benediktsson forsætisráðherra sagði í Silfrinu í gær að það sé ekki til umræðu að taka upp sjómannaafslátt á ný til að liðka fyrir í kjaradeilunni. Hann sagði þó að stjórnvöld vilji gera allt til að hjálpa til.

Páll segir stjórnvöld ekki geta látið þessa auðlind þjóðarinnar liggja óbætta hjá garði:

Það er bara óraunsæi og ég veit svo sem ekki hvern menn eru að blekkja með því ef þeir eru að halda því fram að það sé hægt eða að staðhæfa það að það verði ekki undir neinum kringumstæðum gripið inn í þessa kjaradeilu.