Haraldur Bendiktsson þingmaður Sjálfstæðisflokksins, formaður fjárlaganefndar Alþingis og fyrrum formaður Bændasamtaka Íslands er ekki sáttur við breytingar Þorgerðar Katrínar Gunnarsdóttur landbúnaðar- og sjávarútvegsráðherra á skipan samráðshóps um endurskoðun búvörusamninga.
Fulltrúum var fjölgað úr 12 í 13. Umhverfisráðherra hefur síðan skipað einn fulltrúa og Félag atvinnurekenda einn. Síðan hefur Þorgerður Katrín skipt út þremur fulltrúm sem Gunnar Bragi Sveinsson hafði skipað. Þar á meðal er Guðrún Rósa Þorsteinsdóttir sem var formaður samráðshópsins.
Haraldur segir við Eyjuna:
Ég hef áhyggjur af þeirri sátt og nálgun um endurskoðun búvörusamninga sem atvinnuveganefnd þingsins undirbjó við afgreiðslu búrvörusamninga á síðasta kjörtímabili í góðri samvinnu við flesta stjórnmálaflokka á þingi og við Gunnar Braga Sveinsson þáverandi landbúnaðarráðherra. Ég óttast að þetta sé í hættu núna, að vinna að breiðri sátt um íslenskan landbúnað, eftir þessar vendingar hjá nýjum landbúnaðarráðherra Þorgerði Katrínu Gunnarsdóttur.
Þorgerður Katrín hefur skipað nýjan formann sem er Svanfríður Jónasdóttir. Hún sat á þingi fyrir Þjóðvaka og Samfylkinguna á árunum 1995–2003.
Ég skil ekki þennan snúning Þorgerðar Katrínar. Hér sjáum við vikið til hliðar úr formennsku hópsins konu sem er hafin yfir flokkapólitík. Guðrún Rósa Þorsteinsdóttir kom úr háskólasamfelaginu. Skipan hennar í formennsku var ekki síst vegna þess að Gunnar Bragi var að reyna að lyfta starfinu við búvörusamningana yfir flokkapótlitíkina. Í staðinn er settur flokkspólitískur formaður. Nú má ekki misskilja mín orð. Svanfríður er örugglega hin vænsta kona, búin að vinna gott starf fyrir sitt byggðalag. En hún kemur úr stjórnarandstöðuflokki og er sett af stjórnarráðherra yfir nefnd sem við í meirihlutanum berum ábyrgð á. Þetta eru ekki góð vinnubrögð.
Haraldur telur fleira ámælisvert í tengslum við breytingar Þorgerðar Katrínar á samráðshópnum:
Mér þykir það lýsa ómarkvissum vinnubrögðum af hálfu ráðherrans þegar við horfum upp á breytingu þar sem einum bónda í samráðshópnum er vikið út en hann síðan settur inn aftur. Hvað var það? Síðan má benda á að úrvinnslugeiri landbúnaðarins svo sem mjólkurvöru- eða kjötiðnaðurinn á engan fulltrúa í samráðshópnum núna. Við lögðum mikið upp úr því að skoða samhengi í búvörusamning framtíðarinnar við aðra atvinnuvvegi svo sem ferðaþjónustu, iðnfyrirtæki, þjónustu og byggðamál Það virðist gleymast að matvælaiðnaðurinn er ein stærsta atvinnugrein landsins. Í staðinn eru fulltrúar heildsala frekar teknir inn í hópinn. En ekki fulltrúi frá þeirri grein sem vex hvað hraðast núna, og á mest undir byggð um allt land og góðum matvælum, sem er ferðaþjónustan.
Haraldur Benediktsson, sem er 1. þingmaður Norðvesturkjördæmis þar sem bæði sjávarútvegur og landbúnaður eru meðal helstu atvinnugreina, segist telja að ráðherra landbúnaðar- og sjávarútvegsmála ætti frekar að beina áherslum að kjaradeilu sjómanna og útvegsfyrirtækja:
Ég hefði viljað sjá að ráðherrann léti sig varða um sjómannaverkfallið. Sá skaði er sem sú kjaradeila er nú að valda byggðalögum allt um landið mjög alvarlegur. Það gildir bæði um fólkið og samfélögin í heild. Ég er að heyra af því að ýmis þjónustufyrirtæki, svo sem flutningafyrirtæki og vélsmiðjur sem lifa í tengslum við sjávarútveginn – eigi nú varla lengur fyrir útborgunum launa til starfsfólksins því tekjuflæðið til þeirra hefur stöðvast. Nú síðast sjáum við að flugfélagið Icelandair Cargo sendir út afkomuviðvörun. Flutningar hafa hrunið. Þessar fjárhagslegu afleiðingar hríslast um byggðalögin. Ég veit til að Jón Gunnarsson ráðherra sveitarstjórnarmál hefur sett í gang vinnu við að láta skoða afleiðingar verkfallsins fyrir sveitarfélögin.
Vill Haraldur Benediktsson þá að lög verði sett á verkfallið?
Nei, ég ekki að segja það. Hins vegar tel ég að ráðherra sjávarútvegsmála verði að leita þeirra leiða sem eru færar til að koma mönnum saman og höfða til ábyrgðar þeirra að leysa þessi mál. Þessir deilendur bera þunga samfélagslega ábyrgð.
