Umboðsskrifstofa þungarokkshljómsveitarinnar Manowar, sem átti að halda tónleika í Silfurbergi í Hörpu annað kvöld, hefur tilkynnt að tónleikunum hafi verið frestað vegna veðurskilyrða.

„Því miður þurfum við að tilkynna að vegna verulega slæms veðurs og aflýsingum flugferða til og frá Íslands þurfum við að endurskipuleggja hina uppseldu tónleika í Reykjavík sem áttu að verða 1. febrúar,“ segir í tilkynningu.

Verið er að vinna að nýrri dagsetningu. Keyptir miðar munu gilda á þá tónleika. Biðst umboðsskrifstofan velvirðingar á þessu.

„Við ætlum að færa ykkur tónleikana sem þið eigið skilið og hlökkum til að rokka með ykkur í Reykjavík innan skamms,“ segir í tilkynningu.

ATH – Uppfært

Ný dagsetning er 28. júní 2025.