Fyrr í vikunni var greint frá því að Samkaup og Heimkaup hafa skrifað undir samkomulag um sameiningu félaganna. Samkomulagið er með fyrirvara um samþykki Samkeppniseftirlitsins og hluthafafund beggja félaga.

Verði af sameiningunni munu verslanir 10-11, Prís, Extra auk þriggja verslana sem reknar eru á þjónustustöðvum Orkunnar falla undir rekstur Samkaupa. Hluthafar Heimkaupa fá greitt, eftir sameiningu, með hlutafé í Samkaupum og eignast rúmlega 10% hlutafjár í Samkaupum. Gert er ráð fyrir skráningu félagsins á hlutabréfamarkað, segir í tilkynningu frá Skel hf. eiganda Heimkaupa. Önnur félög í eigu SKEL á neytendamarkaði, Orkan, Lyfjaval og Löður, eru ekki hluti af sameiningunni.

Þetta segja Jón G. Hauksson og Sigurður Már Jónsson mikil tíðindi í þætti þeirra af Hluthafaspjallinu á Brotkast.

„Ég held að Heimkaup, 10-11 og Extra samkvæmt þessu hafi ekki verið rekin með slikum hagnaði,“ segir Jón, þar sem þeir félagar hafa rætt að 10% hlutafé sé kannski lítið. En eftir sameiningu mun Skel eiga 15% í Samkaupum.

„Það er kannski sá hluti af peningnum sem við sjáum ekki hvernig það ferli á að gerast. Ég geri ráð fyrir að Skel muni leiða það ferli með því að auka hlutafé eitthvað,“ segir Sigurður um skráningu félagsins á hlutabréfamarkað. Jón bætir við að mögulega verði nýtt hlutafjárútboð og jafnvel almenningi hleypt að, Hagar og Festi eru á hlutabréfamarkaði.

Ræða þeir félagar hvaða þýðingu sameiningin hafi og rekstrarsögu þeirra verslana sem um ræðir. Segir Jón eigendur bjartsýna á að mikil samlegð sé í sameiningunni.

„Ég sé fullt af Prís verslunum opna á næsta ári,“ segir Jón. Segir hann Jón Ásgeir Jóhannesson stjórnarformann Skeljar hafa langa reynslu á þessum markaði og kunna á hann og segist Jón trúa því að það sé verið að hugsa stórt með sameiningunni.

„Ég ætla að segja það að við eigum eftir að sjá tíu Prís verslanir á næsta ári, það er bara mín tilfinning. Ég sé fyrir mér að það sé búið að hugsa þetta út. Ég held við séum að sjá þriðja stærsta matvörurisann á Íslandi, verðuga samkeppni við Krónuna og Bónus. Gunnar Egill forstjóri Samkaupa hefur sagt að Nettó hafi lækkað verulega verðið á þessu ári og búin að endurskipuleggja sig.“

Horfa má á þáttinn í heild sinni á Brotkast.