Trompetleikarinn Baldvin Oddsson hefur verið harðlega gagnrýndur undanfarið eftir að hann rak 99 starfsmenn, eða um 90 prósent af starfsliði sínu, fyrir að skrópa á morgunfundi. Baldvin gefur þó lítið fyrir gagnrýnina og segir uppsagnirnar hafa verið skynsamar fyrir rekstur hans. Baldvin rekur fyrirtækið The Musicians Club í Bandaríkjunum sem sérhæfir sig í sölu á hljóðfærum og tengdum varningi. Heimildin fjallar um málið í dag.
Fyrrum starfsmaður vakti athygli á málinu á Reddit og deildi þar skilaboðum sem Baldvin hafði sent starfsliði sínu, sem samanstóð af bæði verktökum og fastráðnum starfsmönnum.
„Þið öll sem ekki mættuð á fundinn í morgun, lítið á þetta sem formlega tilkynningu – þið eruð öll rekin,“ skrifaði Baldvin á Slack-síðu vinnustaðarins. Hann sagði að starfsfólk hafi vanefnt ráðningasamning sinn með því að mæta ekki á fundina sem þeim bar að mæta á. Af 110 starfsmönnum hefðu bara 11 mætt. „Ég gaf ykkur tækifæri til að bæta líf ykkar, til að leggja hart að ykkur og vaxa. Engu að síður hafið þið sýnt mér að þið takið þessu tækifæri ekki alvarlega. Af 110 starfsmönnum mættu bara 11 í morgun. Þessir 11 halda vinnunni. Hinum ykkar hefur verið sagt upp störfum. Snáfið út úr fyrirtækinu mínu undir eins.“
Fyrrum starfsmenn tjáðu sig á Reddit og sögðust aldrei hafa fengið fundarboð. Einn lýsti því að hann hefði einmitt hafið störf þennan örlagaríka dag. Hann hafi ekki fengið boð um að mæta á fundinn heldur bara reiðilesturinn frá Baldvin. Í kjölfarið hafi hann fundað með hópstjórum fyrirtækisins sem vöruðu við forstjóranum – hann væri hræðilegur yfirmaður sem hataði starfsfólk sitt. Svo starfsmaðurinn ákvað að láta gott heita, skráði sig út af vinnuspjallinu og ákvað að vara við fyrirtækinu á Reddit.
„Það fór allt á hliðina. Það voru sumir þarna sem höfðu unnið með forstjóranum árum saman og voru ekki varaðir við því að þetta myndi gerast. Stærsti vandinn var að starfsmennirnir voru ólaunaðir og í fjarvinnu. Allir voru með ólíka dagskrá og það var erfitt að negla niður nákvæma mætingartíma – og þetta var það sem forstjórinn var svona ósáttur með.“
Starfsmennirnir voru flestir nemar og fengu ekki launað fyrir störf sín og flestir voru í hlutastarfi. Starfsmenn segja að Baldvin hafi byggt rekstur sinn á ókeypis vinnuframlagi nema í fjarvinnu, þetta sé fáránlegt viðskiptalíkan, sérstaklega þegar starfsfólk fær svona yfirgengilegar skammir fyrir framlag sitt.
Tónlistarmiðillinn MusicTech hefur heyrt hljóðupptöku frá nokkrum fundum fyrirtækisins sem og skjáskot af samræðum á Slack. Þar megi sjá marga starfsmenn lýsa yfir sárum vonbrigðum með uppsagnirnar.
Baldvin segir í yfirlýsingu á LinkedIn að hann hafi fengið yfirþyrmandi athygli út af málinu – bæði jákvæða og neikvæða. Þó að sumir ætli sér að slaufa honum þá verði þeim ekki kápan úr því klæðinu. Viðskipti hafi blómstrað sem aldrei fyrr og starfsumsóknum rigni inn.
„Að reka þetta fólk var rétt ákvörðun fyrir rekstur okkar og við erum sterkari sem aldrei fyrr.“
Baldvin er hæfileikaríkur trompetleikari sem vakti ungur mikla athygli. Hann leik einleikaraprófi 15 ára og árið 2015 sigraði hann einleikarakeppni Sinfóníuhljómsveitar Íslands, svo fáein dæmi séu tekin. Hann hefur eins komið að kennslu og kennt við virta listaháskólann Julliard í New York. Hann stofnaði The Musicians Club árið 2023.
