Sóknarmaðurinn Eric Maxim Choupo-Moting er að snúa aftur á völlinn en hann hefur fundið sér nýtt félag.

Það eru flestir sem kannast við þennan ágæta mann sem hefur leikið fyrir lið eins og Paris Saint-Germain og Bayern Munchen.

Choupo-Moting var yfirleitt varamaður hjá þessum stórliðum en lék einnig fyrir Mainz, Schalke og Stoke.

Kamerúninn er 35 ára gamall í dag og hefur samþykkt að ganga í raðir New York Red Bulls í Bandaríkjunum.

Hann mun ganga í raðir Red Bulls í byrjun janúar en talið er líklegt að Jurgen Klopp, yfirmaður knattspyrnumála hjá Red Bull, hafi haft eitthvað að gera með skiptin.

Klopp þekkir vel til leikmannsins sem var lengi vel hjá Mainz þar sem Klopp bæði lék og þjálfaði á sínum tíma.