En í grein sem Óskar skrifar á Vísi segir hann að meðferð svína og annarra eldisdýra sé svo grimmileg að ólíklegt er að komandi kynslóðir líti meðferð núverandi kynslóða með velþóknun.
„Opnum hugann og hættum neyslu afurða úr því helvíti á jörð sem eldisbúin eru,“ segir hann í grein sinni og nefnir að þeim sem kynna sér aðstæður dýra í eldisiðnaði komi á óvart hversu mannskepnan getur verið vægðarlaus við þau varnarlausu.
„Þrátt fyrir stórbrotna vitundarvakningu undanfarinna áratuga varðandi umgengni manna um viðkvæma náttúru, hafa dýrin af einhverri ástæðu verið undanskilin,“ segir hann og bætir við að margir sem mega ekki til þess hugsa að mannskepnan spilli náttúrunni láti sig litlu skipta skelfileg örlög eldisdýra.
„Sumpart má um kenna að meðferð þeirra er ekki á almanna vitorði; er tryggilega falin innan veggja eldisbúanna enda um að ræða sannkallað helvíti á jörð fyrir varnarlaus dýrin.“
Óskar segir að nú þegar líður að jólum með tilheyrandi veisluhöldum séu blessuð eldisdýrin oftar en ekki fórnarlömb veisluhaldanna. „Svínin þar á meðal, enda kvalaafurðir þeirra taldar við hæfi þegar mannskepnan fagnar hátíð ljóssins. Ekkert er þó fjarri sanni en að neysla afurða dýra sem þola álíka þrautir og kvalræði á sinni stuttu lífsleið, eigi eitthvað skylt við þann boðskap sem tengist jólunum.“
Óskar segir að aukin menntun og aðgengi að upplýsingum um illa meðferð eldisdýra hafi valdið því að ungt og vel gert fólk hafi verið í fararbroddi fyrir aukinni velferð dýra.
„Málflutningur þessa unga fólks einkennist af ríkri siðferðiskennd og samúð með þeim varnarlausu dýrum sem gista kvalakistur eldisbúanna. Tökum þetta unga fólk til fyrirmyndar og breytum neysluvenjum okkar, líka á jólunum.“
Bent er á það í lok greinarinnar að Samtök um dýravelferð á Íslandi (SDÍ) standi nú þriðja árið í röð fyrir auglýsingaherferð sem hvetur fólk til þess að kaupa ekki svínakjöt í jólamatinn.
