Maður heitir Davíð Þór Björgvinsson og skrifar um trú sína á EES-samningnum í DV 12. nóvember sl.  Allt yfirbragð greinarinnar gefur til kynna að höfundur hafi sannfærst um að Íslendingum séu skömmtuð gæði þessa heims í gegnum EES-samninginn og án hans væri eilíft myrkur.  Til vitnis er kölluð sjálf Þórdís Kolbrún Reykfjörð Gylfadóttir.  Hún sagði það á fundi þar sem vinir EES-samningsins hittust.   Davíð Þór heyrði sjálfur þegar spámaðurinn sagði frá, og lesendur DV skella upp úr.

Davíð Þór fjallar um þá „einföldu hugsun að forsenda fyrir sameiginlegum markaði á sviði vöruviðskipta, þjónustu, fjármagnsflutninga og vinnuafls sé að sömu reglur gildi alls staðar á honum.“  Það er vissulega einföld hugsun, en hún er líka barnalega einfeldningsleg.  Allir vita, að allt þetta sem nefnt er, er stundað í stórum stíl um allan heim af sjálfstæðum ríkjum og allir vita að Íslendingar stunduðu blómleg viðskipti löngu fyrir daga EES-samningsins.  Ríki heims geta sett sér ólíkar reglur og sum ríki þurfa ekki að ráða yfir öðrum til að eiga farsæl viðskipti.  Þannig hefur það lengi verið.

Frelsi sjálfstæðra ríkja til að setja sér lög kemur ekki í veg fyrir að þau afriti annarra ríkja lög og það er öllum að meinalausu.  Það er á hinn bóginn ekki að meinalausu ef íþyngjandi lögum sem henta ekki og kostar mikið að framfylgja er þvingað upp á þjóðir.  Það ætti Davíð Þór og allir sem þetta lesa að íhuga vandlega.

Greinarstúfur Davíðs Þórs Björgvinssonar, lagaprófessors, er dálítið fyndinn, en ekki alvöru framlag til stjórnmálaumræðu á Íslandi.

Höfundur er formaður Heimssýnar